El grupu astur-arxentinu Fardaxu prepara’l llanzamientu del so segundu discu

El grupu Fardaxu, formáu por miembros del Centru Asturianu de Buenos Aires y del Taller de Música y Artes Buenos Aires (TAMABA), ta trabayando na edición española del so segundu discu “Revolución Celta”. Anticipándose a tala edición, la formación astur-arxentina ufierta la posibilidá de descargar la melodía del tema d’apertura del discu, “El Pericote”, como sintonía pal teléfonu móvil.

Pa consiguir la melodía monofónica del tema basta con unviar un mensaxe de testu al 7200 poniendo “celtatono pericote”. Mentes que si lo que se quier ye la melodía polifónica hai que mandar un mensaxe al mesmu númeru poniendo “celtapoli pericote”.

El discu “Revolución Celta” ta basáu en temes de la música tradicional asturiana al que la formación añede arreglos innovadores. Nél cuntaron cola collaboración d’abondos invitaos de prestixu internacional, como Flavio Benito na gaita, las cantareiras Xoldra del Centru de Cultura Gallega Xeito Novo, Daniel García de la Cuesta en bandurria, y Arturo Schneider (flautista d’Astor Piazzolla), ente otros.

En xunetu y agostu de 2005, el grupu Fardaxu fixo la so primer xira española, participando ente otros conciertos nel Festival Intercélticu d’Avilés, xunta Carlos Nuñez y teniendo abonda repercusión nos medios de comunicación.