El Gobiernu va xubir 100 euros les beques pa los estudiantes con menos recursos

El Gobiernu va xubir 100 euros les beques pa los estudiantes con menos recursos
09 xunetu 09:12 2018 Imprimir

El Gobiernu va xubir 100 euros les beques pa los estudiantes con menos recursos a lo llargo d’esti mes de xunetu.

El decretu de beques pal próximu cursu que’l Conseyu de Ministros va probar a lo llargo d’esti mes contempla una xubida de 100 euros nes ayudes que van recibir los estudiantes con menos recursos, según el borrador presentáu pol Ministeriu d’Educación énte’l Conseyu Escolar del Estáu.

La llamada cuantía fixa de la beca, que va pasar de 1.500 euros a 1.600 si’l decretu aprobarase nos mesmos términos que’l borrador, podrán llograla los alumnos que tengan siquier un 6,5 de nota media nel cursu anterior y que les sos families tean nel pasu más baxu d’ingresos. Tienen derechu a esta ayuda, por casu, los alumnos con ingresos añales inferiores a 11.143 euros nel casu de families de trés miembros o de 14.613 euros si son cuatro miembros.

Esti ye l’únicu cambéu que tien previstu introducir el Gobiernu de Pedro Sánchez nel sistema de beques xenerales de cara al próximu cursu. Les otres dos novedaes que van incorporar les ayudes al estudiu que se van conceder a partir de setiembre yá les propunxo l’anterior ministru, Íñigo Méndez de Vigo, nel borrador de decretu que dio a conocer en mayu pasáu, primero que trunfara la moción de censura que supunxo’l so cese y el de too l’Executivu, cambeos que’l departamentu agora dirixíu por Isabel Celaá decidió caltener.

El principal cambéu que va traer el decretu ye que la nota pa llograr una beca que convierta en gratuita la matrícula pa los estudiantes de primer cursu de los graos universitarios va amenorgar del 5,5 de nota media qu’impunxo’l PP en 2012 al 5. Sía que non, pa optar a esta beca tien de tratase d’estudiantes con unos ingresos añales inferiores a 40.796 euros (pa families de cuatro miembros).

L’otru cambéu yá previstu por Méndez de Vigo ye que’l sistema de beques va premiar l’esfuerzu de los alumnos escelentes, polo que los estudiantes de Bachiller, FP de grau mediu y cimeru o de graos universitarios que tengan más d’un ocho de nota media y que cumplan colos criterios de renta familiar esixíos van recibir un aumentu de l’ayuda fixa según la calificación qu’entá ta por determinar.

Según el conteníu del borrador de beques, el cambéu que nun va encetar el Gobiernu, siquier pal próximu cursu, ye una promesa repitida del PSOE na oposición y una demanda continua de gran parte de la comunidá escolar y universitaria. El decretu va caltener la esixencia, impuesta pol PP en 2012, cuando endureció les condiciones académiques p’aportar a les ayudes al estudiu, de cuntar con 6,5 de nota media pa poder aportar a una beca completa. Ye dicir pa llograr non solo la matrícula gratuita sinón tamién la cuantía afitada –la compensación por renta familiar- y, nel so casu, la subvención, d’otros 1.500 euros, pa sufragar los gastos d’agospiamientu y mantención si l’estudiante túvose que mover a cursar estudios llueñe de la so casa habitual.

  Categories: