El Gobiernu concede a Serrat la Gran Cruz de la Orde Civil d’Alfonso X el Sabiu

El Gobiernu concede a Serrat la Gran Cruz de la Orde Civil d’Alfonso X el Sabiu
09 avientu 13:54 2021 Imprimir

El Conseyu de Ministros, a iniciativa del Presidente del Gobiernu, Pedro Sánchez, y a propuesta de la ministra d’Educación y Formación Profesional, Pilar Allegría, concedió al cantautor, compositor, actor, escritor, poeta y músicu Joan Manuel Serrat la Gran Cruz de la Orde Civil d’Alfonso X el Sabiu pola so carrera y la so contribución a la cultura y l’arte español”.

“Serrat ye una persona reconocida n’España pero que, énte l’anunciu de la so retirada oficial, el Gobiernu quixo reconoce-y con esta condecoración”, señaló la ministra de Política Territorial y vocera del Gobiernu, Isabel Rodríguez, en rueda de prensa posterior al Conseyu de Ministros.

Tal que señala l’Executivu, Serrat ye “una de les figures más relevantes de la música, la lliteratura y el folclor español desque empezara la so carrera en 1965″. Pioneru de la Nova Cançó catalana, foi reconocíu con numberosos doctoraos honoris causa, la Medaya d’Oru al Méritu nel Trabayu (2006), la Medaya d’Oru de la ciudá de Barcelona (2006) o la Medaya d’Honor del Parlamentu de Cataluña (2007), amás del Grammy Llatinu ‘Persona del añu’ en 2014, ente otros importantes galardones.

La so obra tien influencies d’otros poetes, como Mario Benedetti, Antonio Machado, Miguel Hernández, Rafael Alberti, Federico García Lorca, Pablo Neruda, Joan Salvat-Papasseit y Llión Felipe ente otros; lo mesmo que de diversos xéneros, como’l folclor catalán, la copla española, el tangu, el boleru y del cancioneru popular de Llatinoamérica, pos hai versionado cantares de Violeta Parra y de Víctor Jara.

Por estos motivos, el Conseyu de Ministros aprobó la concesión al artista catalán de la Gran Cruz de la Orde Civil d’Alfonso X El Sabiu, la distinción de mayor rangu pa persones físiques que nun sían xefes d’Estáu o d’Altes Instituciones. Precisamente, esti martes 7 d’avientu conocióse que la última xira de Serrat va arrincar n’abril de 2022 nel Beacon Theatre de Nueva York, pa dempués recalar en Suramérica y finalmente tornar a España pa la dómina braniza, onde va ufiertar el primer conciertu’l 8 de xunu en Murcia.

  Categories: