Portada Emigración El Gobiernu autonómicu duplica l’ayuda p’atención sanitaria a asturianos emigraos a l’Arxentina

El Gobiernu autonómicu duplica l’ayuda p’atención sanitaria a asturianos emigraos a l’Arxentina

by asturnet

De poco más de 40.000 euros l’añu pasáu, a 80.000 euros nesti exerciciu. El Gobiernu’l Principáu destina esa cantidá pa meyorar l’atención sanitaria de los asturianos emigraos a l’Arxentina y enfótase en da-yos cobertura mélica a unes 440 persones con problemes de salú y escasos recursos vinculaes al Centru Asturianu de Buenos Aires, según precisó esti mediudía n’Uviéu el conseyeru de Xusticia, Seguridá Pública y Relaciones Esteriores, Francisco Javier García Valledor.

Asina, los datos asoleyaos pol conseyeru cifren en 24.000 euros la partida que’l Principáu empobinó pa la primer convocatoria d’ayudes sanitaries a emigrantes, hai agora dos años. En 2003, eses subvenciones medraron hasta los 45.000 euros y beneficiaron a 300 persones, númberos que quedarán baxos si se cumplen les previsiones pa esti exerciciu y l’apoyu del Gobiernu -aumentáu hasta los 80.000 euros- llega a unos 440 beneficiarios.

Con tales ayudes, l’Executivu asturianu quier amenorgar los efectos de la crisis económica desatada n’Arxentina a finales de 2001, que dexó a dellos emigrantes asturianos nuna situación enforma precaria, y busca amás caltener la vinculación de la colonia asturiana d’esi país sudamericanu al Centru Asturianu de Buenos Aires.

Responsables d’esa entidá -el vicepresidente, Faustino García, y el secretariu, Celestino García- acompañaron na so comparecencia a Valledor, que recordó la convocatoria, inda abierta, pa la concesión d’ayudes económiques a los asturianos residentes nel esterior que sufren dalgún tipu de discapacidá física, síquica o sensorial.

Tamién te podria gustar