El gobiernu asturianu fomentará l’accesibilidá web nes páxines de los Ayuntamientos

El Gobiernu del Principáu d’Asturies, xunto colos Ayuntamientos, ta acabante d’entamar col procesu pa escoyer un xestor pal futuru consorciu asturianu de servicios tecnolóxicos, que se va encargar de garantizar que los sitios n’internet de los ayuntamientos asturianos cumplan cola normativa llegal esistente en materia d’accesibilidá web. Esta noticia llega al mes de que’l viceconseyeru de Modernización y Recursos Humanos, Luis Iturrioz anunciara la so creación na entrega de premios “TAW” d’accesibilidá web organizaos pola Fundación CTIC.

Anguaño son 64 los ayuntamientos asturianos los que ufren páxina web na rede anque namái siete cumplen cola normativa. El restu presenten problemes d’accesibilidá, una navegación trabayosa o tan mal diseñaes. Según la Conseyera d’Administraciones Públiques, Ana Rosa Migoya, el consorciu va trabayar pa camudar esta situación, al tiempo recordó que cumplir colos másimos estándares na materia “ye tamién un requisitu llegal”.

Al Consorciu vam poder acoyese aquellos ayuntamientos que cunten con menos de 20.000 habitantes censaos, sobre manera los que menos recursos económicos tienen y onde’l gobiernu quier implantar especialmente’l modelu d’administración dixital. De momentu apuntáronse 59 corporaciones d’un total de 71 ayuntamientos pa los que ta disponible esta iniciativa.