El Gobiernu afita la promoción interna na universidá

El Gobiernu afita la promoción interna na universidá
12 setiembre 12:37 2015 Imprimir

El Conseyu de Ministros aprobó esti vienres día 11 de setiembre pela mañana y ensin avisu previu un real decretu que va permitir la promoción interna de profesor titular a caderalgu na Universidá pública.

El Gobiernu diz que’l so oxetivu ye desapexar parte del tapón que, demientres los últimos años, formóse nel procesu de promoción interna del personal de les universidaes públiques, pero abre una caxa de pandora que naide hasta agora plantegó siquiera por dir contra los requisitos d’igualdá, méritu y capacidá que consgra la constitución.

A lo llargo de la crisis, por cuenta de les llimitaciones del Gobiernu a la tasa de reposición d’efectivos, nun se sustituyeren el profesores que se diben xubilando, pero tamién, de forma paralela,  paralizaranse les posibilidaes de los docentes de dir xubiendo nel escalafón.

Hasta esti real decretu, el Gobiernu interpretaba que, si un titular algamaba una plaza de caderalgu, tamién se consumía tasa de reposición, polo que, na práctica, les posibilidaes de promoción interna dientro de les universidaes yeren bien poques. Los centros preferíen emplegar la pequena tasa de reposición que teníen en reponer el personal que se xubilaba primero qu’places que permitieren ascender al profesoráu que yá taba dientro de la universidá. El real decretu desbloquia esta situación oldeando la universidá al restu d’alministraciones públiques en cuanto a la tasa de reposición.

La midida dexa l’ascensu a catedráticos de los profesores titulares que cumplan los requisitos. Esto significa que los acreditaos a catedráticos que taben esperando llograr el so plaza van poder tenela agora, llogrando más “estabilidá” y “los incentivos necesarios pal desenvolvimientu de la so carrera profesional”, según informó’l Ministeriu d’Educación nuna nota de prensa. Los sindicatos llevaben faciendo esti reclamu dende hai tiempu, polo que nel planu políticu hai consensu en considerala una midida electoralista dafechu.

La midida tien llimitaciones, porque “les places ufiertaes en promoción interna nun van poder superar el númberu máximu de places de funcionarios que sían oxetu d’ufierta d’emplegu públicu de vez llibre nesi mesmu añu”. Esto significa que nun va haber más ascensos a catedráticos que nuevos profesores qu’entren.

Otra cosa que va dexar esti decretu ye consolidar la movilidá ente instituciones universitaries tantu de profesores titulares como de catedráticos porque incorpora a la Llei Orgánica d’Universidaes (LOU) una midida que yá se contempló de forma temporal na Llei de Presupuestos Xenerales de 2015 pola que se dexa a los campus convocar concursos pa la provisión de places docentes vacantes a les que van poder aportar profesores ya investigadores de les distintes universidaes del territoriu nacional. Anque na realidá eso ya lo podíen facer, pero compitiendo con xente de toa mena. Lo que se fai agora ye piesllar l’accesu a eses places al profesoráu esternu al sistema universitariu públicu.

  Categories:
Loading Facebook Comments ...