El Gobiernu abre la busca de director xeneral pa la tv autonómica

El Gobiernu del Principáu empezará darréu a esbillar nomes pa decidir quién va ser el director xeneral de la futura televisión autonómica asturiana, cuyu conseyu d’alministración elixiráse a la fin nel mes de febreru, llueu qu’un cambiu llegal incluyíu na llei d’acompañamientu de los presupuestos permitiera valtiar el bloquéu del Partíu Popular (PP) a la puesta en marcha del nuevu ente públicu de comunicación.

La busca de candidatos pa exercer la dirección de la radiotelevisión asturiana abriráse col conseyu yá nomáu y con tres criterios básicos: El PSOE quier a una persona con amplia esperiencia profesional nel ámbetu de la comunicación audiovisual y que conoza a fondu les nueves tecnoloxíes, mientres qu’Izquierda Xunida pon enriba la mesa la necesidá de que’l director de la TV seya asturianu pa evitar qu’un equipu foriatu ensin conocencia del país marque les llinies mayestres del nuevu ente.

N’otres pallabres, los socios de los socialistes nel Gobiernu del Principáu entienden qu’hai qu’elixir a un profesional col abondu conocimientu de la realidá social, económica y cultural d’Asturies, en gran midida pa facer posible una radiotelevisión distinta, de calidá y enraigonada nel so entornu.

El Boletín Oficial del Principáu d’Asturies (BOPA) espublizó l’últimu día de 2003 la modificación de la Llei 2/2003, de Medios de Comunicación Social, pa salvar el bloquéu que’l PP exerce sobre’l proyectu de la TV desque’l PSOE perdió la mayoría absoluta nes pasaes ellecciones autonómiques. El cambiu llegal permite precisamente el nomamientu d’ocho de los quince miembros del conseyu d’alministración por a lo menos dos grupos parlamentarios

El Gobiernu prevé que la radiotelevisión asturiana empiece emitir na seronda dende unes instalaciones provisionales na Universidá Llaboral de Xixón, pa llueu treslladase al Parque Tecnolóxicu, en Llanera. El PP caltién so oposición al proyectu por entender que nun ye una actuación preferente y que resulta enforma caru.