El globu col logo de Xixón va sobrevolar la ciudá esta selmana

El globu col logo de Xixón va sobrevolar la ciudá esta selmana
21 abril 21:19 2020 Imprimir

El globu col logo de Xixón va sobrevolar la ciudá esta selmana col oxetivu de que’l confinamientu deriváu del estáu d’alarma sía más llevaderu para les vecines y vecinos del conceyu, y enllene d’ilusión los llares con un entretenimientu más del que puede esfrutase al traviés de les ventanes ensin necesidá de salir de les cases.

El globu aerostáticu col logo de la ciudá va derromper el cielu de Xixón esta selmana. L’oxetivu ye que’l confinamientu deriváu del estáu d’alarma sía más llevaderu para les vecines y vecinos del conceyu, según enllenar d’ilusión los llares con un entretenimientu más del que puede esfrutase al traviés de les ventanes ensin necesidá de salir de les cases.

Si les condiciones meteorolóxiques dexen, el globu va realizar dos vuelos al día mientres toa esta selmana con una duración envalorada d’ente 30 y 45 minutos. Ún va ser n’horariu de mañana y otru n’horariu de tarde, desapegando na forqueta de les 11:30 y les 12:30 hores y de les 18:30 y les 19:30 hores.

La primer salida tuvo llugar esti llunes 20 d’abril, dende Cimadevilla. El restu de los percorríos van depender del vientu del día anque la so trayectoria va ser siempres de norte a sur con variaciones a este o oeste. Los puntos previstos pa les distintes partíes son l’Avenida del Llanu (frente al centru comercial Los Frenos), el Náuticu, el Puertu Deportivu, El Solarón, La Calzada, El Cotu, El Rinconín y La Plaza de Toros. D’esta miente, búscase llegar a tol conceyu.

Estos datos facilitaos son una estimación a la espera de la previsión diaria del tiempu atmostéricu, por ello, el siguimientu de los vuelos puede realizase nel siguiente enlace https://flightpacktracker.appspot.com/track.html?flightName=volarenasturias.

Esta iniciativa, impulsada pol Conceyu y la empresa Volar n’Asturies, forma parte de la campaña de promoción ‘Xixón espérate’ que llanzó apocayá la Conceyalía de Turismu. Dientro de la web www.volarenasturias.com s van xubise semeyes de la ciudá dende los altores, semeyes sacaes dende los vuelos d’esta selmana. Amás, van realizase retresmisiones en directu dende’l Facebook de la mesma empresa. Como tamién se busca la participación de la ciudadanía, dende’l consistoriu animar a que el xixoneses y gijones faigan fotografíes del globu dende les sos viviendes y xubir a les redes sociales col hastag globogijon.

En cuanto al globu aerostáticu, trátase d’un modelu de competición con capacidá pa pilotu y acompañante qu’alleguen, davezu, a les pruebes entamaes inclusive fora del país. Cola barquilla incluyida, esta aeronave que pasia’l nome de la villa polos altores mide 25 metros y el so vela pesa 104 kilogramos.

  Categories: