Portada Música El glamour con raigañu de Willie DeVille escampló la primer nueche de fiesta del Crossroad

El glamour con raigañu de Willie DeVille escampló la primer nueche de fiesta del Crossroad

by asturnet

El Crossroad Festival echó andar ayer colos radiales calientes y con sabor a vieyu xenuínu rock’n’roll de los barceloneses King Wolf & The Hound Dogs. Un bon empiezu pa preparar la salida al escenariu de la estrella de la nueche Willie DeVille nuna primer xornada del macro xixonés que tuvo menos públicu del esperáu. L’americanu nun defraudó a los dos mil o tres mil amigos de los sones auténticos que lu esperaben y dende la so entrada ente les solombres, como si realmente pasara per ellí y el so primer saludu col sombreru al respetable, derrochó a lo llargo d’una intensa actuación elegancia y sobriedá a mamplén. Un soníu curiáu hasta l’últimu decibeliu y una interpretación impecable robraron el pasu de la primer estrella del festival qu’al pesar de la so xenerosidá nes tables cásique supo a poco.

Con un daqué de retrasu sobre l’horariu previstu el Crossroad Festival echó a rodar con una de les meyores bandes de rock’n’roll del panorama barcelonés, King Wolf & The Hound Dogs, que dende les sos primeres canciones supieron atraer alrodiu l’escenariu central del recintu de Cabueñes al públicu que s’esperdigaba peles barres de bar con una cerveza, gusmiando pelos tenderetes del mercaín o visitando la carpa solidaria de la ONG ACCEM. Al pesar del papelón de ser los que rompíen el xelu, los catalanes amosaron una complicidá col públicu y una amuesa de bon pañu que se supo agradecer.

La banda de Willie DeVille entró en danza a les once y media, escamplando’l terrén pa l’aparición de la estrella con una introducción suxerente y de resonancies limpies na que paecía condensase lo que diba ser la sesión posterior col home del sombreru negru. DeVille sumóse a la banda como una solombra más, ensin estridencies, afayándose al llau del contrabaxista y enllenando de sópitu l’escenariu cola so presencia sobria, serena: l’home de negru que paecía venir d’una fiesta

con señes de dobletazu y perdispuestu a entamar otra fiesta pa los que taben esperándolu como invitáu.

Inda digan lo que digan los eternos aguarones que disfruten dinamitando estrelles, l’americanu amosó a lo llargo de la so actuación que la suya nin ta en declive nin va en picao sinón que sigue llogrando tresmitir en directo, cola mesma sabeduría que nes sos grabaciones n’estudiu, una maxa escura y enllena de recovecos que lleva al qu’entra nel so círculu envolvente a un tiempu nel que la música yera una aventura íntima ente’l bruxu que la invocaba cola so palabra bien midida y el que se dexaba fechizar per ella.

Un empiezu de luxu pa un festival que dende la so primer edición en 2003 vien medrando hasta llegar a la qu’echó a rodar ayer con un cartelu de nivel considerable. Y una vez más énte una ufierta tan atractiva y económicamente asequible (precios de saldu nos abonos y nes entraes por un día en comparanza cola mayoría de los macrofestivales de veranu del restu l’estáu)la sensación tristayosa de comprebar que n’Asturies la xente nun sabe apreciar lo que tien más cerca. El fomentu d’una cultura del “equí too grandono y de baldre” y la babayería énte los esfuerzos de los que son de casa abulten bien calaes nesi nós dispersu que nun algama la categoría de públicu, a la manera na qu’esiste en comunidaes como el País Vascu, Cataluña o Madrid. El datu de qu’alrodiu un 70 por cientu de los abonos del Crossroad Festival apecháronlu xente de fuera d’Asturies da media idea de lo poco qu’equí s’estima lo que se fai dende l’enfotu y el llabor d’unos pocos idealistes de la iniciativa privada n’eventos culturales.

Inda asina los asistentes al conciertu de Willie DeVille, como de xuro los que van poder disfrutar esti viernes de El Vez, Blues Explosion, Blaster, Presidents of The USA; el sábadu de la primer actuación nesti estáu de la reinona madre del rock’n’roll, Little Richard, nel que va ser ún de los sos últimos conciertos posibles n’Europa, y de propina a Los Lobos; la despidida y pieslle del domingu col Elvis mexicanu otra vuelta y los divertidísimos y espíricos Superratones arxentinos, ensin dulda van saber apreciar el trabayu y el riesgu económicu entamáu polos organizadores d’esti festival que se consolida na so tercera edición como’l más importante d’Asturies y con un listón difícil de sobrepasar. Pero de tristes y tristures ta’l mundu enllenu. Que los munchos o pocos que saben apreciar el rock’n’roll de raigaños xenuinos disfruten estos cuatro díes de folixa encesa y si la respuesta a la fin nun ye la esperada, que’l brinde del poeta Manuel Asur: golvamos a entamar valga d’estímulu a los organizadores del festival xixonés pa que l’añu que vien el listón seya más altu. Y d’equí al domingu abonda folixa bona queda.

Tamién te podria gustar