El Garrapiellu promociona con un cartafueyu la “Travesía andariega de Xixón a Cuadonga”

La Tertulia Cultural El Garrapiellu presentó estos díes un cartafueyu nuevu pa la promoción de la “Travesía andariega de Xixón a Cuadonga”. Del folletu fízose una tirada de 2.500 exemplares y la organización tien la intención de facer una nueva tirada pal añu viniente.

Dende 1993, esti camín hestóricu ta señalizau coles “garrapielles” (fleches marielles y un trisquel, símbolu solar celta), coles qu’El Garrapiellu quixo facilitar el camín a los pelegrinos, que según comenten dende la organización pueden esfrutar “de paisaxes de plasmu”.

El cartafueyu inclúi un mapa onde se señalen los finxos más importantes de la ruta, como ye’l Güeyu (onde ñaz el ríu Peñafrancia), na xixonesa parroquia de Deva, o los horros del conocíu pueblu maliayu de Sietes. Hai tamién, nesti cartafueyu, una llista de pueblos cola desplicación de qué edificios y llugares puen vese, amás d’onde tán los chigres que “van facer esfrutar cola gastronomía del país”.

La publicación va distribuyise peles Oficines de Turismu y establecimientos hosteleros de los conceyos pelos que pasa esti camín.

Según cálculos d’El Garrapiellu son al rodiu de 15.000, les persones que faen los setenta kilómetros que tien esta travesía cada añu, “dellos en dos díes, otros en trés y los mas echaos p’alantre y bonos andariegos nun día namás”. Dende El Garrapiellu recomiéndase facela en trés, “p’asina parase en llugares como’l Monesteriu de San Pedru de Villanueva, del sieglu XIII o na ilesia románica de San Xuan, n’Amandi, fecha nel sieglu XII”.

Esti cartafueyu ta fechu col sofitu de la Conseyería de Cultura y Turismu d’Asturies.