Portada Lliteratura El ganador del premiu de novela ‘Café Gijón’ conoceráse’l 16 de setiembre

El ganador del premiu de novela ‘Café Gijón’ conoceráse’l 16 de setiembre

by asturnet

El fallu emitiráse’l xueves 16 de setiembre. El xuráu del prestixosu premiu de novela ‘Café Gijón’ asoleyará esi día nel café homónimu de Madrid el nome’l ganador del certame na so edición d’esti añu, a la que concurren un total de 260 obres, la mayoría d’elles unviaes dende España y 24 d’elles escrites por autores afincaos n’Asturies, según evidencia’l matasellu de Correos.

Al concursu, qu’algama la so cifra máxima de participantes nes sos cinco décades d’esistencia, presentáronse 36 orixinales procedentes de países estranxeros, ente los que figuren Arxentina, Estaos Xuníos, México, Venezuela, Chile, Cuba, Guatemala, Ecuador, Colombia, Bélxica, Italia, Francia, Israel y Portugal, toos escritos dafechu en llingua castellana y con un llargor mínimu de 150 páxines, como establecen les bases del certame.

Pa l’alxudicación del premiu, caún de los cinco miembros del xuráu -relevantes personalidaes del mundu de les lletres- elixirá otres tantes obres, cifra que dirá menguando en 1 en rondes sucesives hasta que los encargaos de nomar al ganador apuesten, na votación final, por una sola novela. En casu d’empate, habrá una votación estraordinaria pa designar al vencedor, qu’algamará 18.000 euros en metálicu y verá publicada la so obra pola editorial Acantilado.

L’emblemáticu premiu de novela ‘Café Gijón’ nació en 1949, alitáu por un grupu d’intelectuales encabezaos por Fernando Fernán-Gómez, Eduardo Haro-Tecglen, Manuel Aleixandre y el premiu Nobel Camilo José Cela. Dende 1989, el Conceyu de Xixón revitalizó’l concursu asumiendo la dotación y promoción del premiu, que na so última edición recayó nel ayerán Fulgencio Argüelles, pola novela ‘El palacio azul de los ingenieros belgas’.

Tamién te podria gustar