El futuru va protagonizar un ARCOmadrid con muncha presencia femenina

16 febreru 08:51 2018 Imprimir

Como yá fixera va dos años nel so 35 edición, ARCOmadrid presentase en 2018 ensin país invitáu pero con un conceutu protagonista, “el futuru”, y la novedá de que toles secciones de la feria, na que s’esperen 100.000 visitantes, tán comisariadas por muyeres.

“ARCU siempres s’adelantra al futuru nos sos planteamientos, y el presente d’ARCU son les muyeres, que confiamos que sían el futuru de toos”, sorrayó güei en rueda de prensa Carlos Urroz, director de la feria d’arte madrilano, acompañáu del presidente del Comité Executivu de Ifema, Clemente González Soler.

La 37 edición caltien tamañu anque “amonta calidá” y asina va axuntar, del 21 al 25 de febreru, 208 galeríes -49 d’elles per primer vegada na feria-, de les que 160 integren el Programa Xeneral, sumándose a elles les que se van axuntar nes secciones. “Nun tendríamos de falar de paridá, tendríamos de falar d’arte, pero tamién tendríamos de falar de paridá, porque ye importante. Esa ye la paradoxa, qu’una nun quier falar d’ello pero hai que faelo”, espunxo Chus Martínez, comisaria del programa “El futuru nun ye lo que va pasar, sinón lo que vamos faer” al pie de Elise Lammer y Rosa Lleó.

Esti apueste d’ARCU pol futuru “nun tien de ver se como un exemplu paradigmáticu, sinón como xuna forma de convidar al públicu a ver una esposición que tien xuna pluralidá de llinguaxes”, apuntó Martínez, y añedió que “si daqué ye’l futuru, ye’l caltenimientu de toles traces y tolos valores que son positivos nel presente”.

“El futuru nun ye lo que va pasar, sinón lo que vamos faer” va cuntar con 19 galeríes y una ventena d’artistes que van amosar la so diversidá xeneracional y del llinguaxe artísticu, pero’l programa tamién se va estender con otres actividaes a instituciones como’l Muséu Thyssen, CentroCentro, CA2M o MNCARS. El programa “Diálogos”, que va cuntar con 13 galeríes escoyíes por María de Corrolada, Lorena Martínez de Corrolada y Catalina Lozano, va presentar nes sos “stands” obres de dos artistes con una interrellación especialmente concebida para ARCOmadrid, y “Opening”, pela so parte, va apurrir nuevos artistes y escenes a la feria.

El programa, comisariáu por Stefanie Hessler y Illaria Gianni, va presentar a 19 galeríes nacionales ya internacionales con una trayectoria d’un máximu de 7 años. Tamién, coles mires de “anovar ya impulsar un nuevu coleicionismu”, ARCOmadrid pon en marcha distintes iniciatives, como mecomprounaobra, xuna etiqueta cola que van tar marcaes les pieces espuestes inferiores a 5000 euros por que se pierda “el mieu a coleccionar”.

ARCOmadrid va siguir les sos actividaes col XVI Foru d’Espertos, un espaciu para l’alderique en redol a l’actualidá creativa y el mercáu del arte.

  Categories: