El fútbol podría dexar 40 millones

El fútbol podría dexar 40 millones
25 agostu 09:34 2015 Imprimir

Los más de 28 mil espectadores que s’allegaron esti domingu primeru de la Lliga Española de Fútbol a El Molinón  pa ver al Real Madrid son l’exemplu cimeru de los más de 25 millones que calcula la Unión d’Hostelería que va dexar el fútbol esti añu en Xixón, amás d’otros 10 millones n’Uviéu.

Ye ciertu que’l Real Madrid ye unu de los equipos que más aficionaos abasna, pero calcúlase que siquier unos 7.000 veníen de fora de Xixón. Eso supon una importante inyección económica n’hoteles, chigres, restoranes y comercios de la ciudá.

¿Cuántu pue suponer pa la economía de Xixón que’l Sporting xubiera a Primera? Esa yera la entruga que se facía la Unión Hotelera del Principáu d’Asturies y que pa respondésela ellaboró un estudiu ecolos parámetros d’un informe de la Cámara de Comerciu d’Alicante, en 2013, con motivu del ascensu del Elxe a Primera. El presidente de la Unión Hotelera, Fernando Corral, indicó esti día nuna rueda de prensa que “l’impactu económicu abultanos que ye d’ente 25 y 30 millones d’euros añales. Amás, hai que tener en cuenta que l’impactu mediáticu ye bien importante”.

Fernando Corral albidra tamién que “los impactos son bien positivos, porque’l nome de Xixón podrá atopase agora en tolos medios nacionales ya internacionales”. El partíu del domingu ente’l Sporting y el Real Madrid foi tresmitíu por 170 cadenes de televisión pertenecientes a 120 países.

L’estudiu tamién mide l’impactu económicu del fútbol na capital del Principáu de manera que camienta que “l’ascensu del Real Uviéu a Segunda División tien un impactu de 10 millones d’euros añales na ciudá, eso ensin tener en cuenta l’efectu mediáticu de Carso y Carlos Slim”.

Loading Facebook Comments ...