Portada Comunicación El fútbol n’asturianu gana’l Pegollu de los Premios Andrés Solar 2017

El fútbol n’asturianu gana’l Pegollu de los Premios Andrés Solar 2017

by redacción asturnews

El fútbol n’asturianu ganó’l Pegollu de los Premios Andrés Solar 2017, al traviés de los equipos U.C. Ceares, Rosal F.C., C.F.F. Llosalín y C.D.E. Stiaua d’Asturies, que vienen llevando alantre proyectos deportivos populares y cooperativos. Pol contrariu, el Madreñazu foi pal discursu del odiu y xenófobu de Mercedes Fernández, de nomatu “Cherines”, presidenta del PP n’Asturies.

La Xunta pola Defensa la Llingua Asturiana fizo anuncia esti martes 5 d’avientu de los ganadores de los Premios Andrés Solar na so XXXIII edición. Nesta ocasión el Pegollu foi pal fútbol n’asturianu. El Madreñazu foi pal discursu del odiu y xenófobu de Mercedes Fernández, de nomatu “Cherines”, presidenta del PP n’Asturies.

Los Premios Andrés Solar algamen nesti 2017 la XXXIII edición. Nos sos trenta y trés años de trayectoria, los premios tienen una vertiente doble: per un llau, la Xunta premia a una entidá o persona que rescamplara pol so llabor en defensa o promoción del asturianu: esti reconocimientu materialízase nel Pegollu. Pero los Premios Andrés Solar tienen tamién una versión negativa, que reconoz a la persona o entidá que rescamplara pol so llabor negativu pa cola llingua asturiana. Esti dudosu honor represéntase con un “Madreñazu”.

El Pegollu d’esti añu 2017 quier reconocer el llabor del fútbol n’asturianu representáu nos equipos U.C. Ceares, Rosal F.C., C.F.F. Llosalín y C.D.E. Stiaua d’Asturies, que vienen llevando alantre proyectos deportivos populares y cooperativos, y que visibilicen l’asturianu nos diferentes materiales que xenera la so actividá. Son por esto bonos merecedores d’esti premiu.

El “Madreñazu” nesta edición va pal discursu del odiu y xenófobu de Mercedes Fernández, “Cherines”, “cabezalera de la organización política PP n’Asturies, qu’a lo llargo de los últimos tiempos vien faciendo unes declaraciones cada vez más delirantes y ridícules contra la recuperación del asturianu col únicu fin de arrampuñar cuatro votos de los sectores más ultres y casposos de la sociedá asturiana. Por too esto, la Xunta pola Defensa de la Llingua Asturiana considérala bona merecedora del antipremiu”.

La entrega de los Premios va facese’l sábadu 16 d’avientu a les 18:30 hores nel Antiguu Institutu de Xixón. Tamién, como tolos años, depués del actu va haber una espicha nel Antiguu Institutu mesmu.

Tamién te podria gustar