El fotógrafu inglés Bill Bradshaw ganó’l V Concursu de Semeyes de la revista La Sidra

06 avientu 11:02 2011 Imprimir

Tres llargues delliberaciones motivaes pol altu nivel de les semeyes presentaes, el Xuráu aconceyáu nun actu públicu nel Llagar El Mancu (Xixón) decidió dar el primer premiu d’esta edición del V Concursu Semeyes de la revista La Sidra al fotógrafu inglés Bill Bradshaw pola so obra Falling Apples.

El segundu premiu foi pa “Astigarraga”, el terceru pa “Silueta I” y el premiu especial J.R (que ye’l llagar que sofita esti concursu), pa “Mayando Fuerte”. Nesta convocatoria presentárense un total de 145 fotógrafos con 563 semeyes, y comu yera d’esperar la participación foi mayoritariamente asturiana, si bien hai obres presentaes de tol Estáu, destacando Madrid; d’Europa destacó Inglaterra y Rumania; y d’América Llatina, Colombia.

El Xuráu tuvo costituyíu pol fotoperiodista, Xurde Margaride, el Xefe de fotografia d’El Comercio, Jose Simal, Jerome Muñoz Direutor del cientru Integráu d’imaxe y soníu de Llangréu CISLAN y los fotógrafos d’estudiu Lorena Ayala y Carlos Manuel López.

El V Concursu Semeyes LA SIDRA cunta col sofitu del Llagar JR, y ta dotáu colos premios: 1er premiu 600 € (500 € en metálicu y 100 € en llibros), 2u premiu 350 € (300 € en metálicu y 50 € en llibros), 3er premiu 150 € (125 € en metálicu y 25 € en llibros)• y Premiu especial “Sidra JR” dotáu con dos caxes de sidra a la meyor semeya en rellación con dichu llagar y/o los sos productos.

  Categories:
Loading Facebook Comments ...