Hestoria El ‘Foro Jovellanos’ reivindica nel so décimu aniversariu a José Miguel Caso y Francisco Carantoña by asturnet 7 de xineru, 2005 written by asturnet 7 de xineru, 2005 17 La Fundación ‘Foro Jovellanos’ recupera los pasos del estudiosu José Miguel Caso y el periodista Francisco Carantoña. La entidá xixonesa reivindica les figures de dos de los sos ex presidentes nel añu en que se cellebra’l décimu aniversariu del nacimientu de la Fundación. Una conferencia de la escritora Ángeles Caso y una ofrenda floral abren güei les conmemoraciones. La intervención de la periodista asturiana tendrá llugar a les 20 hores nel Muséu Casa Natal de Xovellanos, nel barriu de Cimavilla, y centraráse n’evocar la figura’l so propiu pa, José Miguel Caso, investigador del prócer illustráu xixonés y primer presidente’l ‘Foro Jovellanos’. Darréu de la conferencia, los miembros de la entidá desplazaránse al cercanu Campu Valdés pa depositar un ramu de flores énte’l bustu de Xovellanos. La reivindicación de los ex presidentes de la Fundación ‘Foro Jovellanos’ tendrá continuidá na figura’l segundu presidente de la entidá, el periodista gallegu y ex director del diariu ‘El Comercio’ Francisco Carantoña, quien según los responsables del ‘Foro’ tuvo siempre en Xovellanos la referencia hestórica de reflexón sobre la cotidianidá de la vida xixonesa. Asina lo avanzó esta mañana l’actual másimu responsable de la Fundación ‘Foro Jovellanos’, Jesús Menéndez, na emisora pública Radio 5, nel trescursu d’una entrevista na que precisó que la entidá xixonesa ultima una nueva publicación sobro l’illustráu y mantendrá un ritmu d’a lo menos una actividá por mes pa cellebrar los diez años de vida’l collectivu. El ‘Foro Jovellanos’ quedó constituyíu en Xixón el 6 d’agostu de 1995, siguiendo la güelga’l bicentenariu del Real Institutu Asturianu de Náutica y Mineraloxía fundáu por Gaspar Melchor de Xovellanos na ciudá y el 250 aniversariu de la nacencia l’illustráu. Amás de José Miguel Caso y Francisco Carantoña -dambos fallecíos- foron presidentes de la entidá Luis Adaro y Agustín Antuña. Web de la Fundación ‘Foro Jovellanos’ 0 FacebookTwitterPinterestEmail Anterior El Principáu abre’l trámite pa construyir el centru d’arte de la Llaboral, que prevé rematar a mediaos de 2006 siguiente Los Berrones rentabilicen l’éxitu del so discu en directu con conciertos en Madrid, Lleón y Bilbao Tamién te podria gustar El Trasiegu Fest conclúi col envís de poner... La esposición “Dos patries llevo comigo” fai alcordanza... La Fundación de Cultura anicia los itinerarios sobro... La espo ‘Lápiz, papel y bombes. 1936-1939’ abre... Esposición sobro “Xelaos Revuelta. Cuatro xeneraciones (Llanes, 1922-2022)”... El Conceyu d’Uviéu conmemora los 130 años d’hestoria... Uviéu da’l nome de “Fernando Casáu de Torres”... Les muyeres na represión franquista en Xixón Una esposición en La Calzada remembra ‘Ensidesa 1950,... Olimpiaes asturianes con Sergio Buelga en Llanes