El folk y la música tradicional protagonicen les fiestes del Bollu

El folk y la música tradicional protagonicen les fiestes del Bollu
05 abril 09:00 2019 Imprimir

El folk y la música tradicional protagonicen les fiestes del Bollu que van entamar mesmamente’l sábadu 13 d’abril cola Gala de Presentación de la Xana, Xanina y Dames d’honor, nel Teatru Palacio Valdés a les 20 hores. Conciertos de Rubén Alba, Un de Grao, y Xabier Díaz y As Adufeiras de Salitre son la cartelera cimera de la programación. 

Les fiestes del Bollu, parte indisoluble de la hestoria d’Avilés, cunten un añu más con un marcáu calter musical. La música tradicional y el folk van tener el máximu protagonismu, nes nueches del domingu de Pascua (21 d’abril) y llunes d’El Bollu (22 d’abril). Y refuércense les traces d’identidá de les celebraciones, presidíes pola multitudinaria Comida na Cai, que cumple 27 años, los  desfiles de xarrés, la X Feria d’Alfarería Tradicional, o los festivales de Cantar Asturianu y d’Habaneres.

Ana Hevia, conceyala de Festexos d’Avilés, presentó esti llunes pasáu’l programa y el cartelu d’anguaño, con protagonismu del dulce tradicional de les fiestes: el bollu mantecáu d’Avilés. Resaltó la variedá de propuestes, pensaes para tolos públicos, según el les actividaes más tradicionales y más queríes poles avilesines y los avilesinos, como son la siempres esperada Comida na Cai o los desfiles de xarrés.

Destacó coles mesmes la edil, la importancia que va tener la música, poles cais y places de la ciudá, nun esfuerzu por entamar unes celebraciones multitudinaries y calidable qu’integren a tolos ciudadanos.

La Plaza d’España va acoyer los grandes conciertos de les fiestes d’El Bollu, con un marcáu enrite folk y tradicional. El del domingu 21 d’abril, col prestixosu y multigalardonáu gaiteru avilesín Rubén Alba, al pie de la so banda, a partir de les 21 hores, y el del llunes 22, día grande de los festexos, qu’empecipia a les  19 hora José Martínez Álvarez, Un de Grao, y van concluyir los gallegos Xabier Díaz y As Adufeiras de Salitre.

Tamién se van enllenar les cais de música, gracies a l’ambientación que van apurrir los pasacalles de la Banda de Música y Gaites Dambara de Burela. Ye esta una de les principales novedaes de los festexos d’anguaño, que caltienen coles mesmes otru de los polos d’atracción, la Gran Verbena d’El Bollu, el sábadu 20 d’abril a les 22.30 hores en La Esposición, coles orquestes Anaconda y  Cañón.

Coles mesmes, la Comida na Cai del llunes 22 va cuntar con sobremesa musical (17 hores) nes places del Carbayo, Hermanos Orbón, Carlos Llobu y El Carbayedo. El Festival d’Habaneres, na so 28 edición, va cuntar con corales llegaes d’Asturies, Galicia, Castiella y Llión y Cantabria, que van actuar el domingu y el llunes na Casa de Cultura, a les 20 hores. Entraes: 6 euros. Y la Plaza d’España acueye’l domingu, a les 17.30 hores, el Festival de Cantar Asturianu con destacaos intérpretes.

Y como colofón, avilesinos, avilesines y visitantes van llanzar a la cai n’una Comida na Cai que cumple 27 años y volverá ser multitudinaria, cuidando que’l llunes yeren yá 13.776 les persones apuntaes pa compartir mesa poles cais del centru de la ciudá. La inscripción sigue abierta, de forma totalmente gratuita, hasta’l vienres 5 d’abril, yá ensin necesidá de cita previa, nel edificiu de l’Antigua Pescadería, n’horariu de 9 a 13 y de 16 a 18 hores. Caltiénse al pie de la Comida’l Concursu de Fabada qu’entamen les Ames de Casa de Llaranes, según l’habitual Fabada Pantagruélica que preparen los Xagós de Miranda al pie de los Caños de San Francisco.

Otru de los momentos más esperaos va ser el desfile de xarrés, xarrés y carros engalanaos, qu’anguaño va cuntar con 15 xarrés, 5 del Conceyu incluyida la que van ocupar les Xana, Xanina y les sos Dames d’Honor, obra de Gonzalo de la Cera. El desfile del domingu empieza a les 12.30 hores, y el del llunes, a les 18 hores.

La programación festiva del Bollu d’anguaño llega hasta’l 4 de mayu col festival “L’Universu del Cantar” nel Teatru Palacio Valdés, primeramente previstu pa sábadu 27 d’abril, pero movíu una selmana pa evitar la so coincidencia cola xornada de reflexón de les elecciones de 28 d’abril. “L’universu del cantar” ye un eventu musical que va repasar estremar estilos musicales con actuaciones d’ópera, pop-rock, corales, música clásica, música tradicional asturiana…

Ver programa

  Categories: