El FIC presenta’l xueves una programación de reconocida calidá

by asturnet | noviembre 6, 2013 9:44 am

El Festival de Cine de Xixón consigue axuntar en dos de les sos secciones, Rellumes y Llendes, títulos de reconocida calidá y apuestes de riesgu nel ámbitu cinematográficu, dos vertientes que completen y vertebren la ufierta del FICX.

Con Rellumes, el FICX presenta un total de 11 títulos con destacaos elementos a nivel cinematográficu onde s’entemecen talentos consagraos como Jiri Menzel (Oscar a la meyor película estranxera) presentando’l so últimu trabayu The Don Juans; y mozos realizadores como Jan Ole Gerster que presenta Oh, Boy, un trabayu pol que yá recibió 19 premios y 10 nominaciones en festivales internacionales, daqué que dexa claro’l talentu d’esti debutante en llargumetraxes de ficción.

La selección toma tou tipu de filmografíes, dende les más cercanes y conocíes como Alemaña, Estaos Xuníos o Francia hasta otres muncho más exótiques y estrañes pal públicu xeneral como son la filipina o la coreana.

Toles películes qu’integren Rellumes pueden consultase nel siguiente enllaz:

http://www.gijonfilmfestival.com/page/12707-rellumes

Llindes ye otra sección que preséntase como una selección d’apuestes ventureres que busquen la llende, reponiendo la identidá que tenía la sección orixinalmente: ye’l pasu a un cine qu’amplía les fronteres del espectador. La sección qu’enantes se conocía como Llendes presenta un total de 7 llargumetraxes, na que s’inclúi la producción gallega El murniu golor de la carne, una película rodada nun solu planu secuencia, obra del chilenu Cristóbal Arteaga y financiada gracies al crowdfunding.

Tamién va formar parte de la selección un llargumetraxe como La Piscina del realizador cubanu Carlos Machado Quintela, un trabayu que narra l’entrenamientu de cuatro discapacitaos cubanos y que participó na Sección Panorama del últimu Festival de Berlín. La cinta preséntase agora en Llendes tres la so reconocencia internacional n’otros festivales como L’Habana o Miami.

Toles películes qu’integren Llindes pueden consultase nel siguiente enllaz:

http://www.gijonfilmfestival.com/page/12707-rellumes

El Festival Internacional de Cine de Xixón ta entamáu pol Teatru Xovellanos, patrocináu pol Gobiernu del Principáu d’Asturies, l’Institutu de les Ciencies y les Artes Audiovisuales del Ministeriu d’Educación, Cultura y Deporte, el Programa Media de la Unión Europea y Liberbank-Cajastur. Collabora Coca Cola.

Source URL: http://asturnews.com/el-fic-presental-xueves-una-programacion-de-reconocida-calida/