Portada Conceyos El Festival Sol Celta algama la so VIII edición con una selmana de música y cultura

El Festival Sol Celta algama la so VIII edición con una selmana de música y cultura

by asturnet

El Festival Sol Celta algama la so VIII edición con siete díes de música y actividaes culturales pa tolos públicos, con Manolo Peñayos, una de les metaes de Nuberu, trayendo la so música y la del míticu dúo, nuna programación qu’inclúi bandes asturianes, y llegaes de Galicia, Llión y el País Vascu.

Programáronse 25 actuaciones musicales, con protagonismu para’l folk, pero tamién del rock al ska o al soul. Teatru, presentaciones de llibros, xuegos infantiles, distintes charres y el tradicional Mercao complementen el certame.

Xunetu naz n’Avilés al son de la música. El Festival Sol Celta torna a la ciudá na so VIII edición colos soníos más tradicionales y distintes actividaes culturales pa tolos públicos. Entamáu pola conceyalía de Cultura en collaboración colos colectivos Ventanu 69, Carlos Llobu y HO Estudiu, celebrar dende esta tarde hasta domingu 7 de xunetu na antigua cortil intramuros de la Villa, les places d’Alfonso VI, Carlos Llobu y El Sol, según na cai La Ferrería.

La música ye la protagonista del festival, con hasta 25 actuaciones programaes. El folk ye la principal seña d’identidá d’esti certame, y el públicu va poder esfrutar de grupos asturianos, según llegaos de Galicia, de Llión y del País Vascu. Nun va ser l’únicu estilu musical qu’ufierte’l Sol Celta, tamién hai espaciu para ska, rock ya inclusive soul.

Una de les actuaciones estelares va tener llugar la nueche del sábadu 6, na plaza del Sol. Manolo Peñayos, una de les metaes del míticu grupu Nuberu va ser el protagonista a partir de les 22.30 hores. Armáu cola so guitarra, va interpretar el so repertoriu, pero tamién dalgunos de los himnos intergeneracionales de Nuberu. Tamién participen anguaño bandes y solistes del prestíu de Ún de Grao, Alienda, La Tarrancha o Caldu y vos Rabizos.

L’actividá nun se circunscribe a la música, que va sonar mientres la selmana peles tardes y les nueches, y el sábadu 6 y el domingu 7, tamién dende les 13 hores en sesión vermú. Una edición más, torna’l Mercao Tradicional y d’Artesanía, asitiáu nes cais Xovellanos y La Ferrería, y les places de Carlos Llobu y Alfonso VI. El llunes 1 la so apertura va sirvir como inauguración del festival, a les 18 hores. A partir del martes, y hasta el domingu, va abrir les sos puertes a les 12 del mediudía.

Los visitantes van poder asistir a presentaciones de llibros, como “Cristino García Granda”, d’Andrés Castillo, el llunes a les 18.30 hores, y charres como la de la Lliga Celta d’Asturiés, el miércoles a les 18.30 hores, dambos actos nel Palaciu de Valdecarzana. El teatru va tener un buecu especial na plaza del Sol, de llunes a xueves pela tarde, y el domingu 7, cola representación de “Equí nun paga naide”, de Darío Fo, nun montaxe de Garrapiellu Teatru (18.30 hores).

Y de xacíu, ensin escaecese de les más pequenes y los más pequenos de la casa, con animación infantil al cargu de Tonigrafo y La Caracola, de llunes a xueves a partir de les 19 hores pola cortil del festival.

VIII Festival Sol Celta d’Avilés
1 al 7 de xunetu de 2019

Llunes 1

18.00 hores. Inauguración VIII Mercao Sol Celta (Cortil del Festival).

18.30 hores. Presentación del llibru d’Andrés Castillo “Cristino García Granda” nel Palaciu de Valdecarzana.

19.00 hores. Animación Infantil por Tonigrafo y La Caracola pola cortil del festival.

19.30 hores. Teatru nel Sol (Plaza del Sol).

20.30 hores. Pasacalles de La bandina La Garrapiella pola cortil del festival.

21.00 hores. Conciertu de La bandina La Garrapiella (Plaza de Carlos Llobu).

21.30 hores. Conciertu de Airoa dende Galicia (Plaza del Sol).

23.00 hores. Conciertu de Fontoria (Plaza del Sol).

Martes 2

12.00 hores. VIII Mercao Sol Celta (Cortil del Festival).

19.00 hores. Animación Infantil por Tonigrafo y La Caracola pola cortil del festival.

19.30 hores. Teatru nel Sol (Plaza del Sol).

20.00 hores. Otres Musiques: Conciertu de Rody Herrera (Plaza d’Alfonso VI).

21.00 hores. Conciertu de Folk (Plaza de Carlos Llobu).

22.00 hores. Conciertu d’Un de Grao (Plaza del Sol).

23.00 hores. Conciertu de Figos de Tuna (Plaza del Sol).

Miércoles 3

12.00 hores. VIII Mercao Sol Celta (Cortil del Festival).

18.30 hores. Charra de la Lliga Celta d’ Asturies: “Ástures” (Valdecarzana).

19.00 hores. Animación Infantil por Tonigrafo y La Caracola pola cortil del festival.

19.30 hores. Teatru nel Sol (Plaza del Sol).

20.00 hores. Otres Musiques: Conciertu de La Cosa Nostra (Plaza d’Alfonso VI).

21.00 hores. Conciertu de La Casa Mariella (Plaza de Carlos Llobu).

22.00 hores. Conciertu de Grabniak (Plaza del Sol).

23.00 hores. Conciertu de Caldu y vos Rabizos (Plaza del Sol).

Xueves 4

12.00 hores. VIII Mercao Sol Celta (Cortil del Festival).

19.00 hores. Animación Infantil por Tonigrafo y La Caracola pola cortil del festival.

19.30 hores. Teatru nel Sol (Plaza del Sol).

20.00 hores. Otres Musiques: Conciertu de Guateque Proyect (Plaza d’Alfonso VI).

21.00 hores. Conciertu de Mur (Plaza de Carlos Llobu).

22.30 hores. Conciertu de La Tarrancha (Plaza del Sol).

Vienres 5

12.00 hores. VIII Mercao Sol Celta (Cortil del Festival).

20.00 hores. Otres Musiques: Conciertu de The Buddy Hoolis (Plaza d’Alfonso VI).

21.00 hores. Otres Musiques: Conciertu de The Classic Rock Band (Plaza de Carlos Llobu).

22.30 hores. Conciertu de Kolme Katu dende Euskadi (Plaza del Sol).

23.30 hores. Conciertu de La Jari dende Llión (Plaza del Sol).

Sábadu 6

12.00 hores. VIII Mercao Sol Celta (Cortil del Festival).

13.00 hores. Pinchada Sesión Vermuth (Plaza Alfonso VI).

20.00 hores. Otres Musiques: Conciertu de Havana Blue (Plaza d’Alfonso VI).

21.00 hores. Conciertu de Grabniak (Plaza de Carlos Llobu).

22.30 hores. Conciertu de Manolo Penayos (Nuberu) (Plaza del Sol).

23.30 hores. Conciertu de Patrullar Dixie (Plaza del Sol).

Domingo 7

12.00 hores. VIII Mercao Sol Celta (Cortil del Festival).

13.00 hores. Tonada na Cai del Sol.

13.00 hores. Conciertu d’Un de Grao (Plaza de Carlos Llobu).

18.30 hores. Garapiello Teatru cola obra “Aqui nun paga naide” de Dario Fo (Plaza del Sol).

21.30 hores. Conciertu de Alienda (Plaza del Sol).

 

Tamién te podria gustar