El Festival Internacional de Cine de Xixón ye cada añu más asturianu

Un total de 27 títulos de ceadores del Principáu van dase cita nel certamen qu’entama esta semana, de los que 6 formen parte del Gran Angular Asturianu.

El Festival Internacional de Cine de Xixón sigue col so apueste poles películes empobinaes por realizadores nacíos o venceyaos al Principáu cola presencia de 26 títulos, de los que 11 van competir nes secciones del Día d’Asturies.

Na 53 edición van proyectase 20 curtiumetraxes asturianos, lo que representa’l 25% de les cintes de curtia duración que se van esibir anguaño. Tamién se van ver cinco largometraxes, un 5%del total.

La Nueche del Curtiu Español: Animación inclúi l’últimu trabayu de los hermanos Luis Pelayo y Enol Junquera pa Hollywood, mentantu la competición del Día d’Asturies va tar formada por 11 títulos y l’amuesa contién 8 curtios

Gran Angular Asturianu cuenta con seis films. La competición inclúi los trabayos de Daniel Cabreru (Naranco 93’), José Fernández Rivero (La base del ésitu), Konchi Rodríguez (La pieza que falta) y Mark John Ostrowski (Sixty Spanish Cigarettes). Pela so parte, Julio de la Fonte, un habitual del FICX, va presentar el so documental Voivos acantar la mio vida, Danny Daniel. A ellos súmase Marta García Sarabia, que va presentar el teaser del documental Xesucristo Superstar: un finxu na hestoria del musical español coincidiendo col 40 aniversariu del estrenu de la obra protagonizada por Camilo Sesto. La presentación va tar acompañada por un conciertu sinfónicu col repertoriu del musical, al que va asistir Ángela Carrasco, la María Madalena na versión española del célebre musical de Andrew Lloyd Webber. Esta sección ta patrocinada por Pepsi.

La Nueche del Curtiu Español: Animación tamién va cuntar con presencia asturiana. El xixoneses Enol y Luis Pelayo Junquera lleven más d’una década averándose al cine de xéneru. L’añu pasáu estrenaron la so primer collaboración con Hollywood: Judge Dredd: Superfiend, un curtiumetraxe que narra la hestoria del popular archienemigo del Xuez Dredd: el xuez Death, una criatura demoníaca que considera que la vida, por sigo mesma, ye un crime. Hestoria p’adultos enllena d’humor y violencia, na llínea de toles producciones de Adi Shankar y que foi preseleccionáu pa Meyor Curtiumetraxe d’Animación nos Goya.

El Día d’Asturies celebra anguaño la so edición 16, y failo con once cortometraxes a competición y ocho d’amuesa. La sección dedicada a la producción de curtios de realizadores asturianos ta patrocinada por TPA.