El Festival Fifty-Fifty de Jazz y Poesía va axuntar a casi 90 artistes nacionales ya internacionales en 20 actividaes

Tres más d’añu y mediu de trabayu pa da-y forma, el primer Festival Fifty-Fifty de Jazz y Poesía d’Avilés yá s’atopa a les puertes. La ciudá va convertise mientres cuatro díes, del xueves 18 al domingu 21 de payares, en centru d’atención nacional de dos xéneros lliterarios y musicales tan amestaos, que se van fundir nun eventu únicu.

La filosofía del Fifty-Fifty va dexar esfrutar de talentos emerxentes y consagraos, con criterios de paridá, que lu converten nel primer festival d’esti tipu n’España, y ensin otres referencies nel mundu. Nomes como los de Paco Ibáñez, Benjamín Prau, César Antonio Molina, Raquel Lanseros, Alba Careta o Viktorija Pilatovic, son tan solo un apunte del prestíu de los y les participantes.

En total, una ventena d’actividaes pa tolos públicos gracies a cerca de noventa artistes que van presentar los sos trabayos al traviés de 5 conciertos, 4 recitales de poesía, 5 espectáculos poéticu-musicales, 1  charra y 2 clases maxistrales y 2 talleres. En trés sedes, el Teatru Palacio Valdés, el Teatru de la Factoría Cultural y el Conservatorio Julián Orbón, onde van tener llugar varios estrenos absolutos.

Pa la celebración d’esti eventu collaboren entidaes como la Caxa Rural d’Asturies, amás de Fundación Loewe, Berklee College of Music, la Escuela Música Creativa, l’Asociación d’Intérpretes y Executores d’España (AIE) o la Fundación José Manuel Lara.

Conciertos, recitales, charres, talleres y clases maxistrales componen una programación única, que se va compaxinar con animación musical na cai. El públicu asistente a los recitales de poesía y a la charra sobro la poesía del jazz va tener la oportunidá de parolar  colos y el autores tres los actos, mientres sesiones de firma de llibros. Una completa programación llena d’eventos especiales y, en gran parte, únicos, que van convertir a Avilés nun referente en materia de jazz y poesía, y van dexar complementar la ufierta cultural de la ciudá.

Los talleres y les clases maxistrales van ser gratuitos, so inscripción previa.

Ver Programa d’eventos