Portada Cine El Festival de Xixón pon el pieslle de la so 43 edición con importante presencia d’autores asturianos

El Festival de Xixón pon el pieslle de la so 43 edición con importante presencia d’autores asturianos

by asturnet

La 43 edición del Festival Internacional de Cine de Xixón fina esti viernes 2 con una programación basada un añu más na calidá indepentiente de les películes proyectaes y una escelente acoyida de públicu a les proyecciones. La presencia d’autores asturianos fue persignificativa esti añu en dellos ciclos paralelos a la sección oficial.

Dos títulos esperaos nesti festival y que cumplieron dafechu les espectatives creaes fueron “Cambia de vida. El viaje del Xixón Sound”, un percorríu pola escena independiente playa de mediaos de los noventa a cargu de los realizadores José A. Rodríguez y Elena Medina; l’otru filme, tamién un documental: “El Paisano: un retratu colectivu” de Ramón Lluis Bande, emocionante itinerariu pela alcordanza de catorce voces que van dibuxando’l so perfil del hestóricu dirixente comunista. Los ciclos Desorden y Concierto y el de Llendes acoyeron, respectivamente, estos documentales fechos por autores asturianos.

Entrambes otres producciones con marca del país proyectáronse con relieve dientro’l Festival como “Internacionales en Palestina” d’Alberto Arce y María Moreno, asina como “Al Hamam” de Zouahuir El Hairan, Isaac Lupiáñez y Oscar Vega. El cortometraxe “Sístole-diástole” y el mediometraxe “20-N, la memoria inquieta” de Belarmino García y “Cuba Libre” de Rai García, completaron la presencia asturiana nel festival que tuvo amás el so espaciu pa los nuevos autores nel concursu de cortometraxes del Día d’Asturies y nos dos proyectos d’autores mozos premiaos en “No nos cuentes películas, hazlas”.

Tamién te podria gustar