Portada Cine El festival de San Sebastián va rindir homenaxe a Danny DeVito

El festival de San Sebastián va rindir homenaxe a Danny DeVito

by redacción asturnews
Danny DeVito - Foto: Gage Skidmore (https://www.flickr.com/photos/gageskidmore/)

L’actor, director y productor estadounidense Danny DeVito va ser homenaxáu na 66ª edición del festival de San Sebastián col premiu Donostia por tener una trayectoria de “casi cinco décades venceyada a la interpretación en teatru, cine y televisión, cuntando hestories como actor y realizador”.

DeVito, de 73 años, va recibir el galardón nun eventu nel Palaciu Kursaal el sábadu 22 de setiembre, dientru dela programación d’esti festival que va celebrase ente’l 21 y el 29 d’esi mes.

Con solu 1,47 metros d’estatura, DeVito ta consideráu como unu de los grandes de la so xeneración, dotáu con un humor bien agudu que llega directu al públicu. Lleva n’activu dende 1970 y participó en películes de tolos xéneros, destacando especialmente en comedies como Los ximielgos cuten dos vegaes, como hermanu ximielgu de Arnold Schwarzenegger, Tres el corazón verde, Junior, La guerra de los Rose o Tira a ma del tren. Nestes dos postreres tamién exerció de director. Foi’l malváu pingüín del Batman vuelve de Tim Burton y emocionónos especialmente col so tienru papel de Martini en Daquién voló sobro’l nial del cucu, de Milos Formen, al llau de Jack Nicholson.

Exerció como productor en películes como Pulp Fiction, Gattaca, Man on the moon o Erin Brockovich y como realizador destacó coles mesmes nel drama biográficu Hoffa, un pulsu al poder (1992) y en Matilda (1996), afaciendo con ésitu’l clásicu de Roald Dahl.

DeVito diose a conocer pol so papel na serie de televisión Taxi, que s’emitió ente 1978 y 1983, nel que la so interpretación de Louie de Palma fízolu merecedor d’un Globu d’Oru al meyor actor de repartida en 1980. Otra de les series que-y dieron popularidá foi Colgaos en Filadelfia.

DeVito, casáu cola actriz Rhea Perlman dende 1980 y padres de trés fíos, va presentar en San Sebastián la película d’animación Smallfoot, na que pon voz a unu de los personaxes. El premiu Donostia a DeVito ye’l segundu qu’anuncia la organización tres el que dio a conocer a finales de xunu al director xaponés Hirokazu Kore-eda nel marcu de la presentación de la película Un asuntu de familia, última película del realizador y flamante ganadora de la Palma d’Oru en Cannes.

Asiduo a San Sebastián, esta va ser la so décima participación nel certame desque presentara After Life en 1998. L’añu pasáu los homenaxaos fueron Ricardo Darín, Agnès Varda y Monica Bellucci.

Tamién te podria gustar