El Festival de Lorient sigue enanchando’l so cartelu pal añu d’Asturies

El Festival de Lorient sigue enanchando’l so cartelu pal añu d’Asturies
24 febreru 11:29 2022 Imprimir

La 51ª edición del Festival Interceltique de Lorient, que va celebrase del 5 al 14 d’agostu, vieno acabante amosar agora la segunda y penúltima parte del so programa, cola incorporación de dellos artistes asturianos como Rodrigo Cuevas que refuercien la celebración del añu dedicáu a Asturies nel Festival.

El Festival Interceltique de Lorient yá dio a conocer a 72 artistes. Dempués de Miossec, The Moorings, Fiandola, Gaëtan Roussel, Cécile Corbel, L-R, Ivarh y Only Boys Aloud, ente otros, esta selmana yera la vez d’anunciar la segunda folada d’artistes.

El cartelu inclúi una de les principales bandes celtes del mundu, Capercaillie, que canta n’inglés y en gaélicu y tien casi 20 álbumes nel so haber. Pal so conciertu nel festival, el grupu va tar acompañáu pola Orquesta Sinfónica del Festival Intercélticu de Lorient, dirixida por Greg Lawson.

Nel cartelu tamién figuren el grupu irlandés Lúnasa y el cantante asturianu Rodrigo Cuevas, a los que-yos gusta partir enerxía y bon rollu y que van faer honor a la música tradicional de los sos respectivos países. A ellos xuniránse Ramoneurs de Menhirs, y Vent du Nord, Alffa, SpouM y munchos otros. Los nomes definitivos del programa musical van anunciase’l 8 d’abril.

Hasta agora conózse la participación de dellos grupos asturianos como’l mentáu Rodrigo Cuevas, Silvia Quesada, José Manuel Tejedor y el grupu L-R.

  Categories:
Loading Facebook Comments ...