El Festival de Cultura Urbano Que Nun Apare! celebra la segunda edición esta fin de selmana

El Festival de Cultura Urbano Que Nun Apare! celebra la segunda edición esta fin de selmana
30 mayu 15:02 2018 Imprimir

El Festival de Cultura Urbano Que Nun Apare! celebra la segunda edición con quince actividaes distintes que van del deporte, a los talleres, pasando pela cultura tradicional y urbano, la música y los espectáculos que van desenvolvese nel Parque del Florán esti 2 de xunu.

L’asociación xuvenil Que Nun Apare! fai honor al so nome y vuelve con muncho más nel II Festival de Cultura Urbano de Samartín. El próximu 2 de xunu nel Parque del Florán va celebrase esti eventu gratuitu que va axuntar un total de quince actividaes bien variaes rellacionaes col deporte, la cultura hip hop y reggae, les tradiciones asturianes, la música, les artes escéniques, l’asociacionismu y la educación. La programación va durar de 11 de la mañana a 4 de la madrugada y esti añu va haber autobuses organizaos pa volver a Uviéu y Xixón.

El II Tornéu de Baloncestu na Cai va ser l’arranque del festival a les 11h nel CP Rei Aurelio de Sotrondio. Magar d’ello la mañana enllénase d’actividaes n’El Florán: mercadín d’asociaciones, clase de yoga, xuegos tradicionales asturianos, graffitti, slackline –deporte d’equilibriu sobre una cuerda qu’une dos árboles- y una actuación de maxa van ocupar la programación hasta les 14 hores. Mentanto, dende les 12, la bandina de Los Gascones va animar les cais de Sotrondio y Blimea y va actuar n’El Florán en sesión vermú de 14h a 15h.

Los talleres van entamar dende les 16.30 hores. Taller de güertu urbanu, de baille asturianu, de facer madreñes y de break dance ocupen la tarde hasta les 20h que van dar empiezu nueves actuaciones. El Grupu Folclóricu de Blimea va dar un espectáculu de baille y música hasta les 21.30h; hora na que van tener llugar los conciertos onde les muyeres van ser les protagonistes sobre l’escenariu colos shows del dúu rumba-punk LaTxusma y les raperes Guaja D & Eli Swing.

Raspiando la medianueche, un espectáculu de malabares con fueu va dar pasu al I Conceyu de Soundsystems n’Asturies, que zarra l’eventu faciendo historia de nuevu pa la cultura reggae asturiana. Si na edición pasada estrenábase la primera sound system autóctona –sistema de soníu de madera, ambulante y con orixe xamaicanu-, esti añu va facese un alcuentru ente soundsystems con participación d’Allanái y los gallegos Skank-Fu Hi-Fi. Va ser dende les 12 hasta les 4 de la madrugada; hora na que van salir los buses de vuelta a Uviéu y Xixón.

Con esta nueva edición, Que Nun Apare! da continuidá al éxitu d’esti festival que tuvo la so primer cita’l 15 de xunetu del añu pasáu col oxetivu d’enllenar el vacíu que dexó la non celebración de les tradicionales fiestes de La Llaguna. Una programación cultural y d’ociu diversa; poniendo en valor la interculturalidá, el papel de la muyer y la llingua asturiana; y na que la mocedá seya la protagonista; fueron les claves d’esti eventu autoxestionáu y ensin ánimu d’arriquecimientu que se vuelve a celebrar gracies al sofitu popular, al comerciu y la hostelería de Samartín, y a toles asociaciones, persones y artistes que desendolquen les actividaes.

  Categories:
Loading Facebook Comments ...