El Festival de Cine de Menorca sigue adelantre y bati récord d’inscripciones

El Festival de Cine de Menorca sigue adelantre y bati récord d’inscripciones
11 mayu 09:33 2020 Imprimir

Magar la pandemia de la Covid-19, el Festival Internacional de Cine de Menorca 2020 (FICME) sigue adelantre pel momento cola so quinta edición, que refundia cifres de récord tanto nel so apartáu balear, Balears en Curt, como nel so apartáu nacional/internacional, Illes en Curt, con más de 500 obres recibíes pa la selección final.

Tratase de la cifra de participación más elevada rexistrada hasta la fecha nel concursu oficial del FICME. El desglose de cifres amuesa l’interés amenáu nes dos llínees de la competición. D’entre les cintes recibíes, 52 obres son de producción balear, cifra que casi dobla’l númberu d’obres recibíes l’añu pasáu pa Balears en Curt. Los restantes 455 curtiumetraxes recibíos proceden del restu del territoriu nacional y d’otros países del mundu, con curtiumetraxes llegaos dende los 5 continentes para la sección Illes en Curt.

Del total d’obres recibíes, una selección de 35 curtiumetraxes va ser finalmente la qu’entre a competir na Sección Oficial, que se va celebrar a lo llargo de 5 sesiones coles proyecciones de les obres que van optar a los galardones a meyor cinta. El xuráu que va formar parte d’esta edición ta compuestu por Javier Pachón, presidente de CineCiutat y desarrollador de proyectos d’innovación y tecnoloxía de la comunicación pa distintos organismos internacionales; Carlos R. Ríos, director del D’A Filme Festival – Festival Internacional de Cine d’Autor de Barcelona y l’actriz Ingrid García Jonsson.

L’alta participación de curtiumetraxes dexóse notar nes dos llínees de la sección oficial. Esta va ser la edición con más propuestes producíes en Baleares rexistrada hasta la fecha, una y bones les 52 cintes presentaes casi doblen la cifra del añu pasáu pa Balears en Curt. Coles mesmes, va ser la edición más heterogénea tocantes a la so procedencia, con curtiumetraxes llegaos dende los 5 continentes.

Magar que los trabayos nacionales pal FICME 2020 tienen como cada añu una presencia notable, anguaño la llista de países participantes ye más llarga que nunca. Un total de 51 nacionalidaes tienen representación nel concursu de la sección oficial del festival, dalgunes con filmografías menos conocíes o presentes nos circuitos europeos como’l Congo, Corea del Sur, Vietnam, Singapur, Brasil o Lituania.

D’entre lo países con más tradición nel festival, destaca la elevada participación de Francia, que con 33 curtiumetraxes dobla tamién la so presencia na sección oficial. Italia (29), Arxentina (20), Croacia (17), Alemaña (12) ya Irán (11), son los países que lu siguen en númberu de propuestes. L’alta participación y variedá de propuestes d’anguaño coincide tamién con una mayor respuesta de grandes distribuidores tanto nacionales como internacionales, polo que l’equipu del festival prepara para esta edición una selección de bien altu nivel.

Como cada añu, la temática de les obres a concursu ye abierta, polo que se va volver a cuntar con un ampliu abanicu de temes a concursu. En llínea colos valores del festival, van valorase aquelles obres qu’incidan en temátiques de calter social o traten aspeutos venceyaos a la sostenibilidá. Les obres que se presenten opten a un premiu de 700 euros en metálicu y la preselección para ser proyectada en festivales nacionales colos que collabora’l FICME, amás de recibir de les manos del xuráu un galardón obra d’un artista reconocíu.

  Categories: