El Festival Arcu Atlánticu acueye al ensayu y a la llingua occitana

El Festival Arcu Atlánticu acueye al ensayu y a la llingua occitana
26 xunetu 13:43 2017 Imprimir

Nel Muséu “Casa Natal de Jovellanos”, a les 13 hores, Alfonso Fanjul Peraza presentaba’l so trabayu ganador del premiu na edición de 2016 del IX Premiu “Fierro Botas” d’Ensayu colo qu’entamaba la xornada d’esti miércoles 23 del Festival Arcu Atlánticu.

El trabayu ganador d’esti  IX Premiu “Fierro Botas” d’Ensayu, “Orixe y desendolcu de la cerámica de Faro”, recueye los resultaos de delles campañes d’escavaciones arqueolóxiques nos alfares tradicionales de Faro. L’envís d’esti trabayu yera completar una estaya de la historia d’esta cerámica asturiano, dende los sos oríxenes na Edá Media, hasta la so decadencia industrial a lo cabero’l sieglu XIX.

Los afayos que se fixeron permitieron datar l’aniciu d’esta cerámica nos sieglos XI-XII, dexando abierta la posibilidá de producciones artesanales anteriores na contorna Llimanes. Dende’l sieglu XIV conséñase’l surdimientu de los fornos típicos de Faro, con cambeos teunolóxicos que conformen la base de la futura cerámica tradicional, con un desendolcu qu’algama lo cimero ente los sieglos XVI-XVIII, y la so escayencia un sieglu depués, pola introducción masiva de la lloza.

Alfonso Fanjul Peraza (Madrid 1975) ye arqueólogu, Doctor n’Arqueoloxía pola Universidá Autónoma de Madrid (2014), Máster en Prehistoria pola Universidá de Salamanca (2003) y Llicenciáu n’Historia pola Universidá d’Uviéu (2001). Fizo abondos trabayos de xestión del patrimoniu históricu en delles rexones, centrando la so carrera d’investigación nos castros asturianos, dirixendo escavaciones en dellos xacimientos de la Edá del Fierro, al igual que n’etnoarqueoloxía, onde estorgara col enfotu de completar la secuencia material cerámica de les nueses producciones tradicionales al traviés d’escavaciones arqueolóxiques en dellos alfares d’Asturies. Ye tamién autor d’abondos llibros sobre’l poblamientu castreñu.

El Festival sigue pela tarde, na Plazoleta de Xovellanos de Cimavilla, onde a les 18 Rosa María Medina, esperta n’occitanu, va impartir la segunda de les conferencies sobre les llingües atlántiques d’esti festival. Rosa María Medina Granda ye profesora titular de Llingüística románica de la Universidá d’Uviéu y presidenta de L’Associacion Internacionala d’Estudis Occitans. Doctoróse con una tesis sobre «La negación n’occitanu antiguu». Impartió en delles universidaes conferencies y seminarios d’intercomprensión románica sincrónica y sobre cuestiones medievales. La so investigación más reciente céntrase nes trovadores occitanes.

 

Loading Facebook Comments ...