El domingu celébrase’l primer Día de la Reciella nel Muséu del Pueblu d’Asturies

L’asociación “Reciella: families pol asturianu” vieno acabante facer pública l’actividá que van desarrollar nel Muséu del Pueblu d’Asturies a lo llargo del domingu 1 de setiembre: una xornada, enllena talleres, música y puestos culturales de diferente calter que va tener llugar a lo llargo de tol día, dende l’apertura de puertes del Muséu a les 11.00 hores de la mañana.

Toles actividaes van empobinaes a neños y neñes d’hasta doce años, no que correspondería coles etapes de la Educación Infantil y Educación Primaria. L’elementu común a toes elles ye l’usu del asturianu como llingua vehicular, usu que promueve l’asociación ente los más pequeños dende la so fundación hai agora un añu.

No tocante a les actividaes rescamplen los talleres de baille y traxe’l país; el de contactu cola naturaleza que supondrá l’actividá “Viendo animalinos na Güelga”del propiu Muséu, dirixida pol biólogu y miembru de l’asociación Vitor Xuan Melero; o’l taller musical que llevará’l director de los grupos “Seliquín” y darréu “Xentiquina” Nacho Fonseca. Asina mesmo la xornada tará completada pol “Cuentacuentos pa tola familia” d’Olga Cuervo y el conciertu “Pop piquiñín” nel que’l grupu Petit Pop pondrá’l ramu al día cantando n’asturianu.

Amás d’esti programa d’actividaes dende la organización adelanten la instalación de puestos de manualidaes y llibros de Lliteratura Infantil y Xuvenil n’asturianu cola presencia d’editoriales asturianes.