Esti domingu 16 de setiembre empieza la Selmana Europea de la Movilidá

Esti domingu 16 de setiembre empieza la Selmana Europea de la Movilidá
15 setiembre 12:56 2018 Imprimir

Ignacio Fernández del Pandorial, conceyal d’Urbanismu y Mediu Ambiente, presentó esta selmana, acompañáu por Lluna Pontes, técnica de la Escuela de Sostenibilidá, la programación de la Selmana Europea de la Movilidá, que va empezar el próximu domingu 16 de setiembre, coincidiendo coles fiestes de San Mateo.

El conceyal, quixo convidar a tolos ciudadanos a utilizar medios de tresporte sostenibles: “yo nun tengo coche y aseguro que ye vidable llegar a los sitios ensin un mediu contaminante”.

Sol lema “¡Combina y muévite!”, la programación empieza esti domingu 16 de setiembre con un paséu en bici poles cais d’Uviéu, que va partir, a los once de la mañana, de La Llosa, y cuenta cola collaboración de l’Asociación Asturies Conbici. El martes 18, va llevase a cabu la Ruta Azul, un percorríu empuestu a cuerpu p’afayar la hestoria de l’agua n’Uviéu, y que va salir de la Plaza Feijoo a les 18 hores, y pala que tien de faese la inscripción previa al traviés del corréu electrónicu escuelasostenibleoviedo.es.

El xueves, a les 19 hores, na Biblioteca Pública Pérez de Ayala, la ciclista y viaxera Iria Priendes va falar sobre la so esperiencia percorriendo’l mundu con un modelu de ruta sostenible. Tal que se vien faciendo otros años, el día 21, coincidiendo col Día Grande de San Mateo, va celebrase’l Bicibollu, entamáu pola Asociación Asturies Conbici, va empezase un percorríu que va salir a les 11 hores de La Llosa, pa terminar nel Parque d’Iviernu y esfrutar toos xuntos del tradicional bollu. Y pesllando la programación, el sábadu 22 va celebrase’l Día ensin Coches, nel que se va cerrar la redolada del Campu San Francisco al tráficu, de diez de la mañana a cuatro de la tarde, y van llevase a cabu una serie d’actividaes dientro del parque, ente les que van poder probase les bicicletes eléctriques de la Policía Local.

  Categories:
Loading Facebook Comments ...