El Documental del Mes en Xixón trai una sesión continua con tres películes

16 xunetu 09:08 2019 Imprimir

El Centru Cultura Antiguu Institutu y el so programa Documental del Mes en Xixón train esti martes pela tarde una sesión continua con tres películes:  Over the limit; Gracies pola agua y Amazona.

Nel mes de xunetu queremos ufiertar al públicu del Documental del mes la oportunidá d’esfrutar d’una sesión continua de trés de los documentales de mayor ésitu de los últimos años. Ente ellos escoyimos aquellos quemuestran diverses esmoliciones, problemátiques y realidaes de la nuesa sociedá y les relaciones ente los seres humanos. Vamos Empezar col documental que más públicu tuvo nel añu 2018Over the limit y que trata de la superación, les llendes del ser humanu, l’ambición, la competición, les esixencies del sistema, el deporte…; pa siguir congracies pola agua un documental que plantega la problemática del cambéu climáticu dende un pueblu de Queña, cavilgando sobro la trescendencia de les consecuencies d’esti cambéu sobro la vida de les persones; y cerramos la sesión con una propuesta más intimistaAmazona, una hestoria ente una madre y una fía, un documental qu’amuesa un dilema moral sobro’l conceutu de maternidá, sobro les llendes de la llibertá y la responsabilidá d’una madre con al respective de la so fía, un viaxe íntimu a l’Amazones pa realcontrase, buscar respuestes y cerrar feríes.

Over the limit

Ye la semeya d’una moza atleta que llucha pa consiguir la so máxima ambición mientres tien de cumplir coles mires del esixente sistema oficial d’entrenamientos rusu y dexar de llau la so vida personal. ¿Cuál ye’l preciu que les atletes tán dispuestes a pagar pa llegar al ésitu? “¡Nun yes un ser humanu, yes una atleta!”. Ye la hestoria de l’atleta rusa Rita Mamun, élite en ximnasia rítmica, que, con tan solo 20 años llegó al momentu crucial de la so carrera deportiva, convertise en campeona olímpica.
Dirección y guion: Marta Prus. Polonia, Alemaña, Finlandia (2017). VO en rusu subtituláu en castellán.

Gracies pola agua

Kisilu Musya, un granxeru queñanu, utilizó’l so cámara pa prindar la vida de la so familia, el so pueblu y los efectos devastadores del cambéu climáticu sobro la so tierra. Dempués d’una nube que destrúi la so casa, Kisilu empieza a construyir un movimientu comuñal de llabradores que lluchen contra los impactos del clima y decide viaxar a París por cuenta de la XXI Conferencia sobro’l Cambéu Climáticu, pa intentar tener voz nes conversaciones sobro’l clima y dar un xiru de 180 graos a les polítiques medioambientales.

Dirección: Julia Dahr (activista y cineasta, considerada una de les 30 persones de menos de 30 años más influyentes del 2017 según la revista “Forbes”). Noruega, Reinu Uníu (2017). VO n’inglés y suajili subtitulada en castellán.

Amazona

¿Qué fai que una muyer sía bona madre? ¿Ye necesariu arrenunciar a los tos propios suaños, per estremos que sían, cuando tienes fíos? Clare Weiskopf, la directora del filme, tenía 11 años cuando la so madre fuxó a la xungla colombiana, abandonándola a ella y al so hermanu pequenu. Trenta años dempués, Clare quédase embarazada y decide realcontrase cola so madre pa buscar respuestes y cerrar feríes. Un viaxe a les fondures de l’Amazones que lu va sirvir pa esquizar una relación que creía perdida y que la tresportará al interior del so propiu ser.

Dirección: Clare Weiskopf. Colombia (2016). V.O. en castellán ya inglés, subtitulada en castellán

Centru Cultura Antiguu Institutu. Martes 16 de xunetu Over the limit, a les 17.00 hores; Gracies pola agua, a les 18.30 hores y Amazona, a les 20.30 hores.

  Categories: