Portada Educación El cursu gratuitu “Ilustración, serigrafía y nueves tecnoloxíes” cunta entá con places llibres

El cursu gratuitu “Ilustración, serigrafía y nueves tecnoloxíes” cunta entá con places llibres

by redacción asturnews

El cursu gratuitu “Ilustración,serigrafía y nueves tecnoloxíes” que va dirixíu a muyeres desemplegaes d’ente 18 y 35 años y consta de 245 hores lectives, de les que 40 son práctiques non llaborales nel sector, cunta entá con places llibres.

La Factoría Cultural cuenta con 4 places llibres nel cursu gratuitu denomináu “Ilustración, serigrafía y nueves tecnoloxíes”, que se va desenvolver nes sos instalaciones ente’l 25 de febreru y el 15 de mayu, de llunes a vienres n’horariu de 9 a 14 hores. Hasta’l próximu vienres 22 ye posible formalizar inscripciones nel teléfonu 985 548 617 o, presencialmente, na mesma Factoría Cultural.

El cursu ta dirixíu a muyeres desemplegaes d’ente 18 y 35 años, atendiendo especialmente a aquellos perfiles que cunten con mayores necesidaes de sofitu pal so insertamientu llaboral, el so autoconocimiento y pal refuerzu de les sos capacidaes personal y profesional. L’oxetivu prioritariu ye facilitar l’accesu llaboral de les participantes a los sectores audiovisual, de la moda, de la publicidá o de cualesquier otru sector rellacionáu coles artes gráfiques.

Consta d’una duración de 245 hores lectives, que s’estremen en cuatro bloques. El primeru, de 165 hores, ta dedicáu a la formación técnica específica, encetando distintos aspeutos del dibuxu, el color, la impresión en 3D, la ilustración en testiles y oxetos, o’l diseñu y aplicación de vinilos, ente otros.

El segundu bloque ta dedicáu a la motivación personal y pal emplegu, y va ocupar un total de 20 hores, les mesmes que’l terceru, centráu na orientación a la busca d’empléu y el emprendimiento. A lo último, el cuartu bloque ye’l dedicáu a la realización de práctiques llaborales, con una duración de 40 hores, tutoríes individualizaes y siguimientu mientres el mes posterior a la finalización de les mesmes.

La Factoría Cultural desenvuelve esti cursu en collaboración cola Federación Española d’Universidaes Populares al traviés del proyectu estatal Sara, dirixíu a la motivación y acompañamientu de muyeres moces pa la so participación social y llaboral. Ta financiáu pol Institutu de la Muyer y pa la Igualdá d’Oportunidaes, al traviés de la cofinanciación del Fondu Social Européu nel Programa Operativu d’Inclusión Social y de la Economía Social (POSIES) 2014-2020.

Tamién te podria gustar