El CUPA repulsa la decisión de la Xunta de Facultá de nun incluyir Filoloxía Asturiana nos nuevos títulos

25 xunu 07:34 2008 Imprimir

El Conceyu Universitariu pol Asturianu (CUPA)fizo públicu un comunicáu nel que manifiesten la so “repulsa ya indignación” énte la decisión de la Xunta de la Facultá de Filoloxía d’aprobar la enmienda del profesor Félix Fernández de Castro a la propuesta d’estudiu de Grau de Llingües Modernes presentada pol equipu decanal que presidía hasta ayeri Doña Ana María Cano.

Esta propuesta presentada a la Xunta de la Facultá de Filoloxía, y que foi defendida por Doña Ana María Cano y pol tamién profesor Don Ramón d’Andrés Díaz, suponía, pal CUPA “un cambiu radical no que cinca al estudiu de la llingua asturiana na Universidá d’Uviéu, asitiándola al mesmu nivel que llingües como l’inglés o’l francés”.

La Xunta de Facultá y “por una escasa mayoría de 34 votos frente a 30 votos” optó por aprobar una enmienda que pal CUPA “marxina a la llingua d’Asturies na Facultá de Filoloxía, continuando col absurdu de que primen unos prexuicios acientíficos e ideolóxicos de calter xacobín sobre la necesidá de que la Universidá d’Uvieu seya una Universidá de y pa la sociedá asturiana”.

Pa la dirección del CUPA, “la esistencia d’una Universidá nun se xustifica en sí mesma sinón en función d’un serviciu a los asturianos, pa lo que ye imprescindible que los estudios de Filoloxía recueyan l’estudiu de la llingua del nuesu país”.

Amás, quixeron aplaudir “la decicisón de Doña Ana María Cano, de nun ser cómpliz de l’absurda decisión de la Xunta de Facultá y dimitir”.

El CUPA espera “que se tomen midíes pa dar marcha atrás a esta decisión irracional de sacar al asturianu de la Universidá”.

Páxina del CUPA

  Categories:
Loading Facebook Comments ...