El CUPA insiste na protesta pola falta de cursos d’asturianu na Casa de les Llingües

El Conceyu Universitariu pol Asturianu (CUPA) amosó otra vegada al traviés d’un comunicáu, como yá fizo nel mes de mayu, el so “descontentu” cola dirección de la Casa de les Llingües de la Universidá d’Uviéu pola falta d’ufierta de cursos d’asturianu dende l’entamu de la so actividá, va yá cuasi un añu y mediu.

El CUPA recuerda que Vicente Gotor, Rector de la Universidá d’Uviéu, “prometiere que la Casa de les Llingües diba incluyir nel so programa cursos de llingua asturiana”, un serviciu que, recuerden, “ufriéndose embaxo demanda nun tendría nengún gastu estraordinariu pa la Universidá d’Uviéu”.

Pal Conceyu Universitariu pol Asturianu “ye’l momentu de que la Casa de les Llingües apurra a los alumnos cursos d’asturianu” y animen a la institución universitaria a qu’usen la nuesa llingua “de forma normal”. Como exemplu, el CUPA pon la páxina web de la Casa de les Llingües, que dicen ye “una de les poques de la Universidá d’Uviéu que nun ufierta versión n’asturianu, dempués de la renovación del portal uniovi.es”.