El CSIC espubliza n’asturianu’l so calendariu escolar

El CSIC espubliza n’asturianu’l so calendariu escolar
12 xineru 23:39 2020 Imprimir

EL Centru Superior d’Investigaciones Científiques (CSIC) vieno acabante d’espublizar un calendariu escolar de fechos científicos nes llingues d’España y per primera vegada dal pasu de facer una edición en llingua asturiana, no que ye un material curricular bien necesariu nes aules asturianes y una amuesa de compromisu y normalidá del Centru investigador.

Los escolinos asturianos ya puen lleer na so llingua mnaterna qu’Urano foi sobrevoláu per primer vegada pola sonda Voyager 2 el 24 de xineru de 1986 o que la so “paisana” Margarita Salas, la investigadora del CSIC que desenvolvió la patente más rentable d’España, nació un 30 de payares de 1938. O que Brian May, guitarrista de Queen y astrofísicu, publicó en Nature el primer artículu de la so tesis doctoral el 15 d’avientu de 1972. Nacencies d’investigadores ya investigadores de sonadía, meyores científiques ya intereses como estes fueron axuntaes nel Calendariu científicu escolar 2020, que recueye p’acaldía del añu un aniversariu científicu o tecnolóxicu.

La iniciativa ye frutu del Institutu de Ganadería de Monte, centru mistu del Conseyu Cimeru d’Investigaciones Científiques (CSIC) y la Universidá de Llión, y cuntó cola collaboración d’un ampliu númberu de profesionales de la educación y otres persones voluntaries que, tres una invitación pública a la participación, buscaron y propunxeron aniversarios.

Dirixíu fundamentalmente al alumnáu de Primaria y ESO, el calendariu ta acompañáu d’una guía didáctica con actividaes que pueden ser afeches a distintos rangos d’edá y asignatures. El calendariu y les guíes pueden descargase gratuitamente na páxina web del IGM y tamién tan impreses 3500 copies para’l so espardimientu en centros educativos. Pa favorecer el so usu nes aules, los materiales tán disponibles en castellán, gallegu, euskera, catalán y asturianu.

“Fiximos un esfuerzu por dar a conocer persones y afayos del presente coles mires d’averar la cultura científica a la población más nueva”, esplica Pablo Gutiérrez Torral, coordinador del proyectu. “Amás, punximos especial atención nel usu d’un llinguaxe non sexista y n’asegurar la visibilidá de les muyeres científicu y tecnólogu, para poner a disposición del alumnáu referente que promuevan les vocaciones científicu-técniques ente les neñes y adolescentes”, señala l’investigador del CSIC.
El Calendariu científicu escolar ye un proyectu del IGM que cunta con financiamientu de la Fundación Española pa la Ciencia y la Tecnoloxía (FECYT), adscrita al Ministeriu de Ciencia, Universidaes ya Innovación. La iniciativa, surdida a partir d’una propuesta de l’asociación Europa Laica, cuenta tamién cola collaboración de numberoses entidaes, como la Universidá d’A Coruña, Unibasq, l’Institutu Xeolóxicu y Mineru d’España, la Cátedra de Cultura Científica de la Universidá del País Vascu, l’Asociación Española pa la Meyora de la Ciencia, Museos Científicos Coruñeses, el Parque de les Ciencies d’Andalucía o’l Círculu Escépticu.

Loading Facebook Comments ...