El Coru de la Ópera d’Uviéu va asomase a los balcones del Colexu San Nicolás

El Coru de la Ópera d’Uviéu va asomase a los balcones del Colexu San Nicolás
26 agostu 11:39 2018 Imprimir

Esti domingu, 26 d’agostu a les 21.30 hores y per segundu añu, l’agrupación actúa nes Selmana Grande de les fiestes de San Agustín y va averar al públicu d’Avilés conocíes pieces del repertoriu operístico y cinematográfico. L’ésitu de la primer edición dexó aumentar la duración del conciertu hasta algamar una hora de música.

Les fiestes de San Agustín del añu pasáu estrenaron un acontecimientu singular: un conciertu del Coru de la Ópera d’Uviéu nos balcones del Palaciu de Camposagrado. El gran ésitu de públicu animó a repitir la esperiencia, y dende la conceyalía de Festexos d’Avilés punxéronse manes a la obra para la organización de la segunda entrega.

Nesti 2018 camuda l’escenariu, esta vegada’l prestixosu coru uvieín va asomase a los balcones del colexu San Nicolás, frente a la escampada d’accesu a la Casa de Cultura. Va Ser esti domingu 26 d’agostu, a partir de les 21.30 hores.

Gracies a la gran acoyida de la primer edición, la conceyalía de Festexos alcordó col Coru aumentar la duración d’un conciertu capaz d’atrapar a tou tipu de públicos. Esta vegada va tener una duración d’una hora, motivu pol cual van instalase mediu millar de sielles, de tala forma que los asistentes puedan esfrutalo con absoluta comodidá na plazoleta que dixebra la casa de Cultura del Colexu de San Nicolás.

El Coru de la Ópera d’Uviéu, dirixíu por Elena Mitrevska, va ufiertar nel programa conocíes pieces del repertoriu operísticu, con aries y coros de Bizzet, Puccini, Verdi o Mozart, según melodíes cinematográfiques. Van Ser interpretaes pola trentena de componentes del coru al pie de solistes de la talla de María Eres Peláez (mezzosoprano), Ana Belén Llión García (mezzosoprano), Vanessa del Riego Ledo (sopranu), Ana María Peñáu García (sopranu), Pedro José González Martínez (tenor) y Francisco Sierra Fernández (barítonu).

 

  Categories: