Portada Sociedá El Conseyu Políticu d’Izquierda Xunida aprueba les aliances electorales col Bloque por Asturies y con Los Verdes

El Conseyu Políticu d’Izquierda Xunida aprueba les aliances electorales col Bloque por Asturies y con Los Verdes

by asturnet

El Conseyu Políticu d’Izquierda Xunida aprobó ayeri la coalición electoral col Bloque por Asturies y con Los Verdes. El Conseyu aprobó tamién el documentu “Por una Asturies más social, más sostenible y con más autogobiernu” nel que se recueyen les posiciones polítiques de la organización. Nesti documentu IX defínese como una fuerza asturianista y federalista. El documentu aprobáu nel Conseyu Políticu de la coalición d’izquierdes afita les posiciones polítiques de la organización n’ámbitos como l’autogobiernu o los derechos de la ciudadanía. Asina nel documentu reclámense mayores cuotes d’autogobiernu p’Asturies de cara a la configuración d’un modelu d’estáu federal. La reforma del Estatutu d’Autonomía ye la exa central del documentu detallándose nelli factores como la creación, dientro del futuru Estatutu, d’una carta de derechos de la ciudadanía asturiana.
Esta carta recoyería una serie de derechos como l’accesu a la vivienda o a la educación qu’habríen ser garantizaos pola Comunidá Autónoma.

Los derechos llingüísticos de la ciudadanía asturiana son un de los puntos fundamentales del documentu. Nel mesmu se diz que “una reforma del estatutu que nun contemple la oficialidá ye inaceptable, amás d’absurda”. Izquierda Xunida d’Asturies nel documentu “Por una Asturies más social, más sostenible y con más autogobiernu” considera qu’el futuru estatutu habrá establecer la oficialidá del asturianu y del gallego-asturianu nel so ámbitu.

El documentu dedica bona parte del so espaciu a la oposición d’Izquierda Xunida a proyectos como’l banzáu de Caliao o la macroincineradora de Serín.

L’alianza electoral d’Izquierda Xunida col Bloque por Asturies foi aprobada por más 73% de los votos, tando actualmente a la espera de qu’el Bloque por Asturies anuncie la decisión de mantener o romper l’alianza electoral que mantién con Izquierda Xunida. Nel casu de Los Verdes d’Asturies dalgo más del 74% de los votos del Conseyu Políticu de la organización d’izquierdes apoyaron la decisión de concurrir en coalición cola fuerza ecoloxísta.

Tamién te podria gustar