Portada Cooperación El Conseyu d’Infancia y Adolescencia presentó’l Mapa Infantil d’Avilés

El Conseyu d’Infancia y Adolescencia presentó’l Mapa Infantil d’Avilés

by redacción asturnews

El Conseyu Municipal d’Infancia y Adolescencia axuntó esta selmana pasada  nel Edificiu Fueru para presentar el Mapa Infantil d’Avilés y analizar les acciones que va llevar a cabu a lo llargo del cursu escolar 2017/18.

Na xunta participó la concejala de Mocedá, Raquel Ruiz, qu’aprovechó esta xunta de trabayu cola mocedá del Conseyu pa animalos a convertise “dientro de les sos families y los sos grupos d’amigos n’axentes activos a favor del reciclaje y el correctu tratamientu de borrafes na ciudá”, aprovechando la campaña municipal anguaño en marcha y el proyectu municipal “Redolaes Llimpies” que se lleva a cabu dende la área de Participación Ciudadana.

Mapa Infantil d’Avilés

Esta publicación ye una de les midíes del II Plan d’Infancia y Adolescencia, en concretu’l númberu 2 del ámbitu d’Urbanismu y Medio Ambiente, que pretendía la ellaboración de mapes de los barrios per parte de los mesmos neños, poniendo la so mirada nos recursos, equipamientos y servicios destinaos a la infancia, para “saber lo qu’hai y ver lo que se precisa”.

El proyectu consistió en faer quedaes en barrios con mozos y moces del Conseyu para pasiar pela so zona y dir fotografiando los espacios dedicaos a la infancia. Mientres el trayectu redescubríense espacios pos s’improvisaben xuegos afechos a cada puntu concretu. El proyectu completóse añediendo información sobre cada zona concreta.

Esti Mapa Infantil d’Avilés recueye delles de les rutes urbanes realizaes, nes que s’indiquen puntos principales del trayectu, amuésense dalgunos de los xuegos y actividaes que pueden realizase nel mesmu y un poco d’hestoria o delles informaciones relevantes sobre dicha zona.

Acciones curso 2017/2018

Al respective de les acciones previstes para esti cursu escolar 2017/2018, son les siguientes:

  • Evaluación del II Plan Municipal d’Infancia y Adolescencia. Dichu Plan, que foi’l primeru n’España ellaboráu/lideráu polos mesmos neños, neñes y adolescentes, llegó a la fin de la so vixencia y toca evalualo. Los mesmos chicos y moces del Conseyu diseñaron les ferramientes de valoración del mesmu. Dientro d’ese proceso van recoyese aportaciones para l’III Plan Municipal d’Infancia y Adolescencia, que quier tenese llistu nel primer semestre de 2018.
  • Una investigación en materia de xéneru nos llibros de testu colos neños, neñes y adolescentes.
  • Crear una Guía Infantil sobre’l funcionamientu del Conceyu.
  • Collaboración nel I Alcuentru Européu de Conseyos d’Infancia y Adolescencia (Avilés, 1  a 5 de marzu de 2018) y nel V Alcuentru Estatal de Grupos de Participación Infantil y Adolescente (Uviéu, xunu de 2018).
  • Collaboración nel proyectu municipal “Redolaes Llimpies”.
  • Otres acciones: “Escuela de Youtubers” pa neños y adolescentes, voluntariáu infantil y adolescente, nueves ediciones de Deporte en Familia o de la Nueche del Terror, arte infantil na cai, presencia activa n’alcuentros autonómicos de participación, consultes del Observatoriu de la Infancia d’Asturies, xuntes del Foru Autonómicu d’Infancia, collaboraciones que dende’l Conceyu o dende diverses entidaes vaigan plateando al Conseyu, y nueves idees y propuestes que vaigan surdiendo de los alderiques.

Tamién te podria gustar