El Conseyu de Mayores d’Avilés conoz les primeres acciones d’Avilés como Ciudá Amigable coles Persones Mayores

Nel marcu del Día Internacional de les Persones d’Edá, que se celebraba’l vienres en tol planeta l’alcaldesa d’Avilés, Mariví Monteserín, y la conceyala de Promoción Social, Nuria Delmiro, presentaron al Conseyu de Mayores d’Avilés les primeres acciones qu’Avilés va llevar a cabu como conceyu perteneciente a la Rede Mundial de Ciudaes y Comunidaes Amigables coles Persones Mayores.

La rede escuerre la participación d’esti sector de la población en tomar de decisiones, col fin últimu de promover un avieyamientu saludable y activo.

L’adhesión a esta rede foi alcordada pol Plenu municipal n’agostu de 2020 y ratificada n’abril de 2021 pol IMSERSO, organismu que coordina n’España xuna rede impulsada pola Organización Mundial de la Salú (OMS) pa la década del Avieyamientu Saludable (2021-2030), nel marcu de l’Axenda 2030 y los Oxetivos de Desenvolvimientu Sostenible.

Les midíes sanitaries contra’l COVID-19 y les distintes restricciones vixentes mientres los últimos meses pa la xunta de persones retrasaron la puesta en marcha d’unes acciones que tienen na participación de los y les mayores la so exa fundamental.

L’alcaldesa avanzó que l’ameyoramientu de la situación sanitaria dexa agora poder planiar los primeros trabayos que, a lo postrero, van refundiar los datos necesarios pa ellaborar un diagnósticu inicial sobro la situación de les persones mayores n’Avilés. De los datos que s’estrayigan d’esti diagnósticu inicial va depender el conteníu d’un Plan d’Acción que va detallar les midíes a desenvolver mientres los trés años siguientes a la so aprobación.

El diagnósticu inicial va ser de tipu cuantitativu y cualitativu. Nel planu cuantitativu yá se creó un grupu de trabayu dientro del Conceyu d’Avilés pa definir, con datos procedentes de los distintos servicios municipales, cómo viven les persones mayores en cada zona de la ciudá. Asina, van analizase les característiques xeográfiques, demográfiques, sociales y económiques presentes nes mesmes, detectando faltes y oportunidaes.

Pela so parte, l’analís cualitativu va llograr de les opiniones espresaes nos denominaos Grupos Focales, que van tar integraos por ente 8 y 10 persones. Nellos  van tar representaes edaes d’ente los 60 y los 74 años, edaes cimeres a 75 (procurando qu’haya siempres representación de mayores de 85), niveles sociu-económicos distintos (tomando como referencia’l mediu de la zona, non el de la persona), distintos graos de discapacidá, y grupos étnicos y culturales minoritarios.

Más información