El Conseyu de Drechos Humanos de la ONX interésase pola falta drechos llingüísticos n’Asturies

El Conseyu de Drechos Humanos de la ONX interésase pola falta drechos llingüísticos n’Asturies
23 xineru 11:04 2019 Imprimir

El Conseyu de Drechos Humanos de la ONX vieno acabante interésase pola situación de falta de drechos llingüísticos de los y les asturfalantes, sigun acaba asoleyar Iniciativa pol Asturianu tres d’una entrevista col rellator especial de la ONX.

Fernand de Varennes, Rellator Especial de Naciones Xuníes sobre cuestiones de les minoríes ta de visita oficial n’España estos díes. El sábadu aconceyó con Inaciu Galán, presidente d’Iniciativa pol Asturianu, col envís de conocer meyor la situación de los y les falantes d’asturianu y los sos drechos llingüísticos n’Asturies y nel restu de territorios onde se fala l’asturianu.

Nel trescursu d’esti conceyu de trabayu Inaciu Galán esplicó la situación del asturianu nel ámbitu educativu, nos medios de comunicación públicos, y sobre manera nel ámbitu llegal, dándo-y datos al Rellator Especial sobre la falta de reconocencia oficial n’Asturies y Llión del idioma, tal y como establez l’artículu 3.2 de la Constitución Española.

Iniciativa pol Asturianu va entregar al Altu Comisionáu de Drechos Humanos de les Naciones Xuníes dellos informes propios y d’otres entidaes que van permitir completar la información que’l Rellator Especial va tener pa emitir un informe sobre la situación de los drechos llingüísicos n’Asturies y Llión.

El Rellator Especial tien el mandatu del Conseyu de Drechos Humanos de la ONX d’esaminar y superar les torgues a la realización de los drechos de les persones pertenecientes a minoríes, identificar les meyores práctiques, aplicar una perspectiva de xéneru y afalar la Declaración sobre los drechos de les persones pertenecientes a les minoríes nacionales o étniques, relixoses y llingüístiques.

  Categories:
Loading Facebook Comments ...