Portada Comunicación El Conseyu Asesor de la Llingua de Xixón aprueba por unanimidá’l Plan de Normalización

El Conseyu Asesor de la Llingua de Xixón aprueba por unanimidá’l Plan de Normalización

by redacción asturnews
El portavoz de Xixón Sí Puede, Mario Suarez del Fueyo

El Conseyu Asesor de la Llingua Asturiana del Conceyu de Xixón aprobó esti martes por unanimidá’l Plan de Normalización, un documentu qu’inclúi 68 midíes p’algamar la necesaria normalización del usu del asturianu nel ámbitu socioeconómicu, sociocultural y deportivu, na Alministración pública, na enseñanza, na tresmisión xeneracional, y nos medios de comunicación.

El documentu aprobáu inclúi 68 midíes que faen efectivu’l ruegu que Xixón Si Puede (XsP) presentó nel Plenu pa normalizar l’usu social, alministrativu y educativu del asturianu. Por eso’l primeru en felicitase pola uninimidá, nuna nota de prensa, foi esti miércoles el portavoz de Xixón Sí Puede Mario Suárez del Fueyo qu’amosaba “la satisfacción del grupu muncipal énte l’aprobación por unanimidá del Plan de Normalización Llingüística nel Conseyu Asesor de la Llingua Asturiana nel conceyu cellebráu ayer. El documentu al que se dio’l preste inclúi 68 midíes p’algamar la necesaria normalización del usu del asturianu nel ámbitu socioeconómicu, sociocultural y deportivu, na Alministración pública, na enseñanza, na tresmisión xeneracional, y nos medios de comunicación. Con esti Plan, qu’abarca midíes a desarrollar hasta’l 2019, faese efectivu’l ruegu que XsP presentó nel Plenu de setiembre, nel qu’afaló a dar puxu a la normalización del asturianu nel conceyu”.

Del Fueyo facía alcordanza nesa nota de prensa de que “la mayoría de les midíes que se recueyen nesti Plan yá taben n’anteriores planes de normalización aprobaos en Xixón”, polo qu’aplaudió que “nesta ocasión s’incluyera tanto una temporalización pal cumplimientu de les midíes, como una serie d’indicadores pa valorar el grau de cumplimientu de les mesmes”. A partir d’agora y col plan llistu p’aplicase tres pasar pela Comisión d’Educación y el Plenu de marzu, XsP adelanta que “va tar vixilante pa que dende la Conceyalía se monitorice’l cumplimientu del Plan, tal como se comprometió a facer”.

Xixón Sí Puede recalca amás que “l’usu del asturianu ta cada día más aceptáu por tolos axentes políticos y sociales, lo que ye una gran noticia, porque la defensa de la nuesa tradición llingüística y cultural tien que ser una seña que xunte a toles xixoneses y xixoneses, faciendo normal nel ámbitu institucional lo que ye normal na cai: la convivencia del asturianu col castellán”.
El portavoz de Xixón Sí Puede tamién apunta una de les principales novedaes del Plan: la midida que recueye “estudiar la creación d’un programa pilotu del asturianu como llingua vehicular nel ciclu de 0-3”. Esta midida, como yá se indicó dende la comunicdá educativa, “abre la posibilidá d’atender una reclamación de munches families de que les neñes y los neños s’afaigan al asturianu dende los primeros años, polo que tenemos el convencimientu de que va tener el sofitu de too los sectores implicaos por que se lleve a cabu” conclúi Del Fueyo.

Tamién te podria gustar