El Conseyu Asesor de la Llingua Asturiana esplicó los motivos de la so dimisión

27 avientu 00:21 2006 Imprimir

Los representantes de les organizaciones del Conseyu Asesor de la Llingua de Xixón dieron ayeri una rueda de prensa, nel Conseyu de Mocedá de Xixón, na qu’esplicaren los moticvos que llevaron a esti organu asesor del Aytu. xixonés a tomar el determín de presentar la so dimisión irrevocable, pola falta de voluntá política del PSOE de llevar a lantre les ordenaces municipales d’usu de la llingua asturiana.

El Conseyu Asesor de la Llingua Asturiana venía dende 2003 desendolcando un trabayu d’asesoramientu de les diferentes xeres que vien desendolcando’l Serviciu de Normalización Llingüística de Xixón. Nel añu 2004 esti Conseyu desarrolló una propuesta d’Ordenances Municipales d’Usu de la Llingua Asturiana, que se presentaron a los grupos municipales con representación na Casa Conceyu de Xixón, y que fueron recibíes polos grupos d’Izquierda Xunida-Bloque por Asturies y del Partíu Popular. Mientres el PSOE dilataba l’aconceyamientu p’abordar esta tema. La contestación del PSOE xixonés sobre les ordenances foi “que suponíen la oficialización de la llingua asturiana” y que poro nun se diben desenvolver. Esti puntu foi ún de los que más condicionó la decisión de les diverses organizaciones que componen esti Conseyu Asesor.

Los miembros del Conseyu Asesor de la Llingua criticaron la política de “tapecimientu” de la Oficina de Política Llingüística xixonesa, que pasó de tar nun espaciu visible a ocupar un cuartu nel Antiguu Institutu Xovellanos. Esta midida ye considerada pol Conseyu Asesor como un exemplu de la falta de voluntá política del Consistoriu Xixonés a la hora de normalizar l’idioma.

Los participantes na rueda de prensa amosaron la so voluntá de volver a sentase col Ayuntamientu si la corporación decidía abordar l’estudiu de l¡aplicación de les Ordenances Municipales emanaes dende l’anguaño dimitíu Conseyu Asesor de la Llingua en Xixón.

Les ordenances pal usu del asturianu en Xixón enfrenten a IX-Bloque colos sos socios del PSOE

  Categories:
Loading Facebook Comments ...