Portada Educación El conseyeru d’Educación ve «innecesaria» una EBAU común n’España

El conseyeru d’Educación ve «innecesaria» una EBAU común n’España

by redacción asturnews
Genaro Alonso, Conseyeru d'Educación, Cultura y Deportes

El conseyeru d’Educación, Genaro Alonso, defendió ayeri nel Plenu de la Xunta qu’Asturies aplica afayadizamente la Evaluación de Bachilleratu pal Accesu a la Universidá (EBAU) que reguló’l PP en 2016 al traviés d’un real decretu y amosóse contrariu a qu’esta prueba sía la mesma en tol país.

“EBAU única non, por innecesaria», dixo bien a les clares porque prefier un únicu exame en llugar de que sía cada comunidá autónoma la que, en collaboración coles sos universidaes, diseñe esa prueba. La realización d’una EBAU a la mesma hora y día ya idéntica pa tol país sería, contrapuso el conseyeru, una invasión de competencies autonómiques, amás de traer efectos catastróficos pa los estudiantes”. N’Asturies faise razonablemente bien pal Conseyeru, sigún añedió antes de sollertar de lo qu’implicaría un exame únicu marcáu dende Madrid que nun atendiera a les distintes realidaes y metodoloxíes del alumnáu y el profesoráu de cada rexón.

Tamién se refirió’l conseyeru al conteníu del exame d’Hestoria, diciendo qu’entiende que “naide puede en trés hores a la selmana estudiar la hestoria d’España dende la Prehistoria al sieglu XXI”.

Por mor d’ello, el grupu de trabayu integráu por profesores de Secundaria y de la Universidá d’Uviéu pa sentar les bases d’esta prueba optó por rebaxar la so estensión dende los 97 estándares recoyíos na orde ministerial hasta los 73 temes que los alumnos asturianos tienen de preparar na actualidá. Amás, apuntó, la materia qu’entre nel exame un añu nun volverá cayer el siguiente.

Tamién te podria gustar