El Conseyeru d’Educación falará nes llingües del país y habrá asturianu n’infantil

El Conseyeru d’Educación falará nes llingües del país y habrá asturianu n’infantil
17 setiembre 08:54 2015 Imprimir

El Conseyeru d’Educación dexó bien a les clares nuna comparecencia que llevó tol miércoles 16 de setiembre que va falar davezu nes llingües del país y que l’asturianu va estendese a la educación infantil.

Genaro Alonso foi firme y claru. La diputada de Podemos, Lucía Montejo, foi la que quixo saber si Genaro Alonso diba emplegar l’asturianu nes sos intervenciones públiques. Y el Conseyeru fizo alcordanza de que yá lo ficiera nes dos inauguraciones de cursu escolar, en Cabanaquinta y  en Tapia de Casariego. Y entá dixo más: Les dos intervenciones foron billingües porque Alonso va cambiar de rexistru cuando-y pruya.

Amás de falar de la situación de la llingua asturiana na educación, el Conseyeru tamién lo fizo de la presencia del asturianu na RTPA que dixo sedrá más visible na programación y el sofitu a l’Academia de la Llingua que va cristalizar nun mayor presupuestu.

Darréu de les sos afirmaciónes dende les diez de la mañana qu’entamo la comparecencia del Conseyeru na Xunta Xeneral del Principáu hasta les ocho de la tarde que finara, el cabeza de llista de Podemos, Emilio Llión, nun pudo sino felicitar y felicitase d’alcontrar  un conseyeru educáu y sensible pa cola llingua asturiana, anque amosó duldes sobre la so capacidá de provocar un cambéu na actitú de la FSA.

Y eso venía a cuentu de la entruga envenenada que la diputada Susana López Ares llanzara dende’l PP: Cómo va desenvolvese un conseyeru dafechamente partidariu de la cooficialidá de la llingua nun Gobiernu llideráu por un presidente que nun quier oyir falar d’esti asuntu. Y venía a cuentu tamién de que’l Conseyeru  persupo nun entrar al trapu, cuando contestó a López Ares que “nun busque discrepancies, que nin hai nin les habrá”.

La comparecencia sirvió pa señalar les llínees maestres de la llexislatura y pa facer de la Llingua Asturiana  la protagonista. Ente otres coses, gracies a la anuncia que fizo’l conseyeru: la docencia del Asturianu va estendese a la etapa d’Infantil. Amás tamién se-y entrugó pola  la creación de la nueva dirección xeneral de Planificación Llingüística, dependiente d’Educación, que sigún Alonso nun tien coste económicu dengún y ye percencillo de xustificar: hai casi 25.000 alumnos qu’estudien Asturianu.

López Ares enfotose en dir contra l’asturianu, coo fai davezu la so formación, el partíu popular, y fízolo dende’l desconocimientu interesáu pidiendo más asignatures de llibre configuración en Primaria y nos sólo les dos que s’ufierten, Asturianu o Cultura Asturiana: “Una y otra vienen n’asturianu, asina qu’o llenteyes cocíes o llenteyes frites, pero a la fin comemos llenteyes”, lo que nun ye cierto, porque Cultura Asturiana nun se ta impartiendo n’asturianu. Pero mentir, nesta tema, ye daqué normal un día tres d’otru en sede parllamentaria.

Genaro Alonso tampoco nun entró al trapu y recordo-y a López Ares que’l Gobiernu del PP niega a Asturies un derechu elemental como ye la reconocencia de la especialidá d’Asturianu y cuando López Ares tornó a intentar atropalu nuna incongruencia, contestó-y cola llei d’usu na mano. La cooficialidá ye daqué que tresciende la so Conseyería, porque un cambéu del Estatutu d’Autonomía ye una decisión que nun-y correspuende a Educación, sinón a la Xunta Xeneral.

Loading Facebook Comments ...