El Conseyeru d’Educación Alonso confirma-y a IX que la especialidá d’asturianu avanza

El Conseyeru d’Educación Alonso confirma-y a IX que la especialidá d’asturianu avanza
25 febreru 17:54 2016 Imprimir

El Conseyeru d’Educación, Genaro Alonso, confirmó esta mañana na Xunta Xeneral, a instancies d’IX y frutu d’una proposición non de llei de la coalición na que se demandaba la reconocencia de la especialidá d’asturianu pal profesoráu, que los pasos pa consiguir la estabilidá na enseñanza pa los maestros avancen.

Genaro Alonso confirmó que’l próximu 9 de marzu en Madrid producirase una nueva xunta de la comisión p’atopar la vía de creación de la especialidá. L’abogáu del estáu, recordó’l conseyeru, alvirtió va unos meses que ye una competencia de la comunidá autónoma cuidao que se trata de materies llingüístiques d’especial promoción. “El decretu farémoslu nós, pero vamos pidir al Ministeriu que lu reconoza”, alvirtió’l conseyeru.La diputada d’IX considera que la escuela ye fundamental par la perviviencia de la llingua.

Concha Masa preguntó esta mañana al conseyeru sobre qué piensa facer pa garantizar los drechos de los asturfalantes y pa normalizar l’usu de la llingua. Nesi sentíu, la diputada alvirtió que la coalición va lluchar pola aplicación de la Llei d’Usu na midida de toles posibilidaes y va defender un desenvolvimientu d’esa llei que regule, si fai falta, la so aplicación en tolos ámbitos y especialmente nes instituciones, incluyida la Xunta Xeneral del Principáu d’Asturies.

Masa esplicó qu’IX nun va a conculcar los derechos de naide, sinón qu’aboga pola normalización, pol derechu de tolos asturianos y asturianes a usar la llingua na cual esprésense más cómodamente, de forma natural y respetuosa, el castellán en convivencia col asturianu, con normalidá, ensin estridencies, ensin fanatismos. “De prohibiciones y represión yá tuvimos bastantes dosis nos años negros de la Dictadura”, alvirtió la diputada. En llugar d’atacar al asturianu o reprimir el so usu, l’asturianu, al so xuiciu, hai que valoralo como una parte del patrimoniu, una seña d’identidá, de cultura, del que sentise arguyosu tantu per parte de los castellanofalantes como de los asturfalantes.

El conseyeru, que se comprometió a llevar al máximu la potencialidá de la Llei d’Usu y Promoción del Asturianu y desenvolver les midíes de normalización espuestes pola Dirección de Política Llingüística na esposición parlamentaria d’entamu de llexislatura, coincidió cola diputada d’IX na necesidá de que la llingua nun tien de ser un problema sinón la solución pa comunicase.

Loading Facebook Comments ...