El Conseyeru critica l’usu folklóricu del asturianu na TPA

Na intervención que ficiera esti xueves na Xunta Xeneral del Principáu, el conseyeru de Cultura, Genaro Alonso, criticó l’usu folclóricu de la llingua na TPA y otros medios de comunicación nuna amuesa de sinceridá que pon enrriba la mesa unu de los mayores problemes del procesu de normalización llingüística dende va años.
El conseyeru d’Educación y Cultural del Gobiernu asturianu, Genaro Alonso, criticó esti xueves na so intervención na Xunta  l’usu “folclóricu” que se da a la llingua asturiana en dellos medios de comunicación y especialmente na Televisión del Principáu d’Asturies.

El comentariu fízolu nel plenu de la Xunta Xeneral, onde Genaro Alonso fizo tamién anuncia de que la Conseyería d’Educación del Principáu d’Asturies vieno acabante d’unviar una carta a la editorial Edelvives na que-y solicita’l cambiu del tratamientu que se-y da a la llingua asturiana n’unu de los sos llibros escolares, nel que se refier a la ‘llingua asturiana’  como dialectu del castellán.

La intervención de Genaro Alonso producíase al contesta-y a delles entrugues a la diputada de Podemos Lucía Montejo, cola que dixo tar d’alcuerdu no que cinca a les “intolerables” referencies sin rigor científicu a la identidá de les llingües que se falen nel Estáu.