Portada Educación El Congresu vota en contra de que la comunidá educativa alderique la llei Celaá

El Congresu vota en contra de que la comunidá educativa alderique la llei Celaá

by redacción asturnews
María Isabel Celaá - Foto: La Moncloa - Gobierno de España (https://www.flickr.com/photos/lamoncloa_gob_es/)

La Comisión d’Educación del Congresu votó en contra esti xueves, colos votos, ente otros, de PSOE y Xuníes Podemos, de que la comunidá educativa participe nel trámite parlamentariu actual de la reforma educativa del Gobiernu, la Lomloe o llei Celaá.

Les comparecencies que fueren solicitaes por PP, Ciudadanos y Vox nun salieron adelantre por 20 votos en contra y 16 a favor, ratificándose asina l’alcuerdu sobro comparecencies tomáu’l pasáu día 6 y que provocó que PP, Ciudadanos y Vox acusaren a los partíos que gobiernen en coalición de vetar a la comunidá educativa.

Luz Martínez (PSOE) reconoció qu’hai «urxencia» en tramitar la Lomloe porque dende 2013 quier derogase la Lomce y pallo tán d’alcuerdu la mayoría de los grupos parlamentarios. Joan Mena (Xuníes Podemos) dixo que nun hai que cayer nel interés de la derecha de «dilatar» el trámite parlamentariu pa la nueva llei educativa.

Otra manera, Sandra Moneo (PP) recordó que cola Lomce hubo 50 comparecientes de la comunidá educativa y aprofió que nun se puede dicir agora que yá ye tarde pa llama-yos por tar nel alderique de les enmiendes parciales, pos yá en xunu ella pidió qu’allegaren representantes de la educación. Achacó «nocturnidad» a esta votación, pos se celebró pasaes les 21 hores.

La reforma educativa del Gobiernu, en superando les enmiendes totales de PP, Ciudadanos y Vox, tien d’enfrentase agora a les enmiendes parciales (más de mil) que presentaron los distintos grupos parlamentarios. La próxima selmana va abrise la Ponencia o grupu de trabayu pa esaminar y votar les enmiendes dientro de la Comisión d’Educación, y el testu que sala colos cambeos oportunos va pasar al Congresu pa la so votación.

Tamién te podria gustar