El Congresu va aldericar l’IVA cultural

El presidente del Congresu de los Diputaos, Patxi López, ufiertó ayer garantíes a representantes del mundu del cine, la música y el teatru por que la Cámara Baxa empiece a aldericar lo antes posible una posible baxada del IVA cultural del 21% haya o non Gobiernu.

López realizó estes declaraciones tres l’alcuentru cola Unión d’Asociaciones Empresariales de la Industria Cultural Española, formada por más de 7.000 empreses. Demostró la so disposición favorable a que la Cultura tenga tratamientu de “cuestión d’Estáu”.

“Hubo una agresión brutal al mundu de la cultura nestos años”, dixo’l presidente del Congresu mientres esa xunta, na que los informó de les proposiciones non de llei que yá se presentaron nesti sentíu.

El presidente del Congresu espresó la so seguridá de que los órganos de gobiernu de la Cámara Baxa van aprobar un calendariu lexislativu que dexe l’entamu de los plenos, entá nel supuestu de que nun hubiera inda Gobiernu, y de que, dada la opinión mayoritario y favorable ente los partíos, la baxada del IVA cultural va entrar llueu nel orde del día pal so alderique.

Nesti sentíu, Jesús Cimarro, presidente de la Federación Estatal d’Asociaciones d’Empreses de Teatru y Danza (FAETEDA), recordó qu’esiste una necesidá de decisiones inmediates ante una situación agónica” de les industries culturales, que representen “la cuarta aportación al PIB español” y lleven más de tres año soportando’l IVA cultural al 21%, en desventaxa frente al restu d’Europa.

Dende la plataforma d’industries culturales, tamién se-y comunicó a Patxi López la conveniencia de que la Cultura sía una cuestión d’Estáu” que nun tea al albur de quien gobierne.