El Congresu sofita la declaración d’oficialidá de la llingua asturiana

El Congresu sofita la declaración d’oficialidá de la llingua asturiana
12 marzu 11:15 2021 Imprimir

El Congresu de los Diputaos vieno acabante sofitar esti xueves el puntu de la PNL que pidía la oficialidá de la llingua asturiana,  dempués de munches propuestes de cambeos, que ficieron votar por puntos la Proposición Non de Lllei (PL) orixinal qu’incluyía la reclamación hestórica de la oficialidá, aprobándose la mesma con 194 votos a favor.
El Congresu de los Diputaos aprobó esti xueves el puntu sobre la oficialidá de la PNL qu’Iniciativa pol Asturianu presentó xunto con otres organizaciones de reivindicación llingüística d’otros territorios del Estáu. El puntu 4 de la Proposición Non de Llei dicía: “Impulsar y apoyar reformas estatutarias para la oficialidad de lenguas propias que aún
no son oficiales en una parte o la totalidad del territorio donde se hablan”. Este punto cuntó col sofitu de 194 votos de la Cámara Baxa.

El presidente d’Iniciativa pol Asturianu felicitóse por esti resultáu hestóricu pa la reclamación de la oficialidá del asturianu. Iván Llera dexó bien a les clares que “dempués del complicáu trámite parllamentariu con munches propuestes de cambeos votóse por puntos la PNL orixinal qu’incluyía la reclamación hestórica de la oficialidá. Ye la primera vegada na hestoria que les Cortes Xenerales sofiten esa demanda d’oficialidá de la nuesa llingua” apuntó’l presidente de la organización de defensa del idioma.

Llera aclaró que “dende Iniciativa pol Asturianu queremos cuntar cola mayoría de los partíos políticos pa llograr esi mesmu consensu na Xunta Xeneral. Queremos sumar y llograr una mayoría de votos afirmativos a favor de la oficialidá incluyendo a partíos de diferentes sensibilidaes y de tol arcu parlamentariu asturianu. Ye un pasu importante que les Cortes sofiten y seyan conscientes de la realidá llingüística d’Asturies onde la sociedá quier vivir n’asturianu con normalidá constitucional y nun clima d’armonía coles diferentes llingües que se falen n’Asturies”.

Pa terminar, el representante de la organización aprovechó pa dar les gracies a toles persones que collaboraron p’algamar esti ésitu. “En primer llugar, a tolos compañeros y toles compañeres del restu d’organizaciones de reivindicación llingüística que siempres tuvieron atentos a la situación de la llingua asturiana; en segundu llugar, a tolos diputaos y toles diputaes, de manera especial del PSOE y Xuníes Podemos, que dieron el so votu p’atender a esta reclamación hestórica y a los y les representantes asturianos nes Cortes que siempres mos recibieron y atendieron a les nueses demandes”.

  Categories:
Loading Facebook Comments ...