El Congresu de Madrid alcuerda que 2006 sea Añu de la Memoria Hestórica

El Congresu de los Diputaos aprebó colos votos de tolos grupos parlamentarios, a nun ser el del PP, qu’esti añu 2006 tea dedicáu institucionalmente a la Memoria Hestórica y la reparación moral de les víctimes de la guerra civil y la dictadura de Franco. La propuesta, presentada por Izquierda Unida, quier aprovechar la conmemoranza del 75 aniversariu de la II República pa facer xusticia coles xeneraciones condenaes al escaezu.

Na proposición aprebada pol Congresu reconozse al réxime proclamáu el 14 d’abril de 1931 como antecedente del actual periodu democráticu. Nesi sen, remémbrase que la Constitución republicana, aprobada fai 75 años fue la primera que reconoció el sufraxu universal -recoyendo el derecho a votu de les muyeres-, abordó l’afitamientu de los derechos sociales y económicos, poniendo les bases de los que güei conocemos como Estáu del bientar, y trató de solventar l’articulación territorial del estáu al través d’estatutos de autonomía.

Cola iniciativa aprebada, qu’agora entama’l so trámite parlamentariu, el Congresu encamienta al Gobiernu a que promueva nesti añu, en colaboración coles comunidaes autónomes y conceyos, actos d’homenaxe a los que fueron víctimes de la Guerra Civil española y del franquismu. Esti reconocimientu va acompañase de la puesta en circulación de sellos y monedes en recordanza de les persones que defendieron “l’orden constitucional establecíu na II República” y padecieron la represión de los vencedores de la guerra española.