El Congresu alderica la creación de la especialidá docente de Llingua Asturiana

La Comisión d’Educación y FP del Congresu va aldericar esti miércoles una proposición non de llei del Grupu Parlamentariu Confederal de Xuníes Podemos-En Comú Podem-Galicia de mancomún, pola que s’encamienta al Gobiernu a reconocer y crear la Especialidá Docente del Profesoráu de Llingua Asturiana y Lliteratura.

Según espónse na iniciativa, los neños de Primaria estudien l’asturianu o’l gallego-asturianu na so zona d’influencia de forma voluntaria nos centros escolares sosteníos con fondos públicos; mientres que nes etapes de Secundaria y Bachilleratu solo ye posible estudiala de forma optativa nos institutos, compitiendo con otres opciones

L’exerciciu de la docencia de llingua asturiana obliga anguaño a les persones cualificaes a dase d’alta nel Rexistru Xeneral de Capacitación en bable asturianu y en gallego-asturianu, que ye un catálogu nel que s’inscribe al profesoráu que, d’alcuerdu a les condiciones y requisitos regulaos, pide voluntariamente y con calter gratuitu la so incorporación al mesmu.

La demanda de reconocencia y creación de la Especialidá Docente del Profesoráu de Llingua Asturiana y Lliteratura al Ministeriu d’Educación per parte de la sociedá asturiana polo xeneral y sobremanera, por distintes instituciones como la Xunta Xeneral del Principáu d’Asturies y la Conseyería d’Educación del Principáu d’Asturies vien siendo una constante dende l’añu 2005.

N’ochobre de 2014 y xineru de 2015 repitíase’l pidimientu presentando propuestes de cambéu al Proyectu de Real Decretu d’Especialidaes. Y en payares de 2016 tamién, el conseyeru d’Educación y Ciencia del Principáu d’Asturies solicitó retomar negociaciones yá empecipiaes para la reconocencia y creación de la Especialidá Docente del Profesoráu de Llingua Asturiana y Lliteratura.

Los Servicios Xurídicos del Principáu d’Asturies constataron que nun tien capacidá llegal nin títulu habilitante pa dictar el Decretu de la Especialidá Docente del Profesoráu de Llingua Asturiana y Lliteratura, polo que la única vía posible para creación de la Especialidá pasaría pol cambéu de los Reales Decretos d’Especialidá.

En Primaria, les asignatures de Llingua Asturiana y Lliteratura y de Gallego-Asturianu ufiertáronse nel cursu 2020-2021 nun total de 227 colexos d’enseñanza pública (98,7%) y en 42 centros de la rede alcordada (84%), lo que se traduz nun númberu total de 17.464 estudiantes que les cursen. NESO y Bachilleratu ufiertóse la llingua asturiana o’l gallego-asturianu nun total de 79 centros públicos (92,9%) y 25 privaos (49%), con una cifra total de 4.539 alumnos.

En cuanto al profesoráu, en total esti cursu fueron 278 los y les profesores d’asturianu y gallego-asturianu que tuvieron na aula ensin tener reconocida la especialidá de l’asignatura qu’imparten. Esto traduzse, según Xuníes Podemos, en “la práctica total interinidá del profesoráu y na alta proporción de places a media xornada: hasta un 71% de les 278”, calificando la situación de “precariedá”.